ANSONBEAN隔空冧爆Jaime：唔知幾時會唔見咗佢突破偶像派禁忌高調拍拖唔怕「走粉」丨獨家

2024-10-05 07:00

23歲ANSONBEAN（陳毅燊）最近推出跟女友張天穎（Jaime）合寫的新歌《ONE DANCE》兼同名大碟，講到明歌詞是對女友道歉兼示愛，作為偶像派的ANSONBEAN唔怕「走粉」，老實表示拍拖應該開心唔應該收收埋埋，坦言同女友關係好好，一齊工作一齊做Gym一齊練歌，更隔空放火山級閃光彈，「好難得遇到呢個人，唔知幾時會唔見咗呢個人，我好珍惜。」Edan應該好羨慕。採訪：杜杜攝影：朱偉彥髮型:Milk Chan@Xenter Salon 化妝:Zoe Fan 服裝:RICKYY WONG STUDIO 場地:FWD HOUSE 1881

Anson年紀輕輕相當浪漫，又識得自我檢討，恭喜Jaime！

ANSONBEAN決定搵Jaime寫新歌，並非想晒恩愛，只因睇清自己不足，亦只有女友能完美「解讀」他，「我想做R&B情歌，嘗試自己寫，寫完覺得好難聽，最後就問Jaime介唔介意同我寫？」ANSONBEAN好老實，插自己寫歌唔掂，「實在太難聽，所以費事影響到大家。」又不時讚女友，「佢同我close啲，先咁有耐性同能力將我感受變成首歌，佢創作能力好強。」

Anson提到女友，任何問題都笑住答。

被女友說話點醒

歌詞內容來自ANSONBEAN寫的一首英文demo，「講個男仔覺得自己好後生，未玩夠，唔想穩定拍拖，女朋友覺得佢唔認真就走，女仔走咗之後，個男仔先發現真係好鍾意個女仔，好後悔，所以就寫咗呢個demo去承諾個女仔，佢真係愛佢，希望個女仔會畀次機會佢。」呢個貪玩男就係ANSONBEAN，女朋友就是Jaime，「嗰時我哋未開始，認識中，我覺得自己23歲，未諗住穩定拍拖，佢發覺我好唔認真，唔想繼續了解。」人類就係咁奇怪，身邊人走咗先識珍惜，好彩ANSONBEAN最後識覺悟，「遇到啱嘅人就要珍惜，話未玩夠係個無窮無盡嘅慾望，呢個追求係無止境。」

Anson為拍《ONE DANCE》MV，用兩個月時間密集操肌。

雖然Jaime得27歲但好識諗，唔會嬲死ANSONBEAN，仲同佢講經希望感化佢，ANSON好記得女朋友嘅說話，「一段關係如果係健康，應該係互相信任，然後一齊去建立更加好嘅嘢，令到大家成長進步。」最終他決定將示愛道歉歌內容搬落新歌《ONE DANCE》。問到Jaime收到歌時有何反應？他就笑謂：「佢有俾我誠意打動，唔係俾我嘅旋律囉，哈哈！佢冇表示難聽，但佢冇讚我都feel到，哈哈！如果佢覺得好聽，會話好嘢嚟喎，你不如快啲出啦！佢聽完純粹講首歌內容嘅嘢，我都知道難聽㗎嘞！」

Anson入行3年，最感邀家人無限量支持他追夢。

《ONE DANCE》新碟發佈會，Anson即場晒舞技。

「豆粉」批准拍拖

Anson跟Jaime拍拖後首次合作，被女友愛貓搞到敏感喉嚨痕的Anson就話溝通完全冇問題，「有分歧咪溝通囉，我哋崗位分得幾清晰，我負責創意部份多啲，始終我想表達我嘅情緒，佢負責技巧上嘅嘢，呢方面我相信佢，因為佢經驗多過我，基本上冇乜分歧。」他亦唔排除情侶檔合作陸續有來，「我哋都鍾意表演、音樂，一定有合作機會。」兩人唔會掛住拍拖，工作會互畀意見，「譬如post嘢，幾點po先最多人like呢？！記者訪問時，啲問題唔識答點算，我哋都會傾，一齊做Gym、練歌、練舞，一齊進步。」

Anson跟Jaime拍拖不足1年，熱戀期特別甜。

Anson年初跟Jaime去中環嘉年華拍拖爆出戀情。

Jaime家有兩隻貓，Anson因為貓毛敏感搞到喉嚨痕。

對於年初被網民拍到去中環嘉年華拍拖，隨後大方認愛，Anson坦認未公開前兩人已討論過，戀情曝光點處理，「一開始我哋都冇特登收埋，所以先會俾人影到，拍拖最緊要開心，要收收埋埋好多避忌，大家都唔開心，享受唔到呢段關係。」戀愛腦的Anson繼續愛字當頭，23歲偶像派的愛情觀非常浪漫，「愛情好講緣份同要珍惜，好難得遇到呢個人，唔知幾時會唔見咗呢個人，關係需要維繫，一齊後都討論過，我哋都係公眾人物，使唔使避忌？」Anson由貪玩仔變承擔男，既然真拍拖就覺得無謂講大話，「我哋有諗過，俾人影到就影到囉！其實我可以點樣答先？！話我哋係朋友，如果話朋友，對女仔唔公平，對男仔冇乜嘢，咁我哋又真係拍緊拖，所以冇乜所謂。」對於公開戀情他亦不擔心會「走粉」，「我信佢哋會畀空間我，見到我開心時都會開心，暫時睇落都樂觀，佢哋都好支持，畀空間我繼續去拍拖。」