陳柏宇爆囡囡表演慾強但怕醜 江若琳與符曉薇經常交流湊仔經
2024-11-02 15:45 
陳柏宇與女兒陳羿辰（Abigail）、江若琳與兒子蕭立鈞（Owen）、吳若希與兒子何少弘（Kylian）等，今日（2日）出席《家家玩到創遊學團》，當影大合照時，Abigail自行打側翻又做出一字馬，Owen亦突然爆喊，年紀小小的Kylian即遞上汽球玩具氹他。
陳柏宇笑指囡囡表演慾強，但叫到乖乖地影相又會怕醜，由於囡囡學跳舞，所以識做出一字馬。談到可會培養囡囡做運動員，他表示不會刻意，反而覺得小朋友學習有動亦有靜態，稍後囡囡也會學游泳，又爆囡囡好愛錫Owen，經常錫對方。問到可會追生男B，陳柏宇即提議江若琳將兒子交由他托管，晚上先接走。
江若琳則笑謂經常會跟陳柏宇太太有密切溝通傾湊仔經，亦會談論升學問題，又笑指囝囝見不慣大場面而爆喊，亦似足老公性格好驚青，所以每日會帶囝囝出街見人練膽量。陳柏宇笑言現在19個月大的細女以前似足Owen好驚青，就連在紅綠燈等候也會突然爆喊，但屬於小朋友成長過程。問到江若琳可會再追生B，她說：「暫時唔好啦！依家好多親力親為會帶囝囝去playgroup，我無分身術，等囝囝再大啲兩、三歲再諗。」
最新回應