鄭丹瑞拍《得寵先生》中暑暈倒 轟盧慧敏「見死不救」 廖子妤：係咪以為你做緊戲？

由鄭丹瑞（旦哥）、盧慧敏（Amy Lo）、廖子妤（Fish）合作的新片《得寵先生》上映，近日四出謝票宣傳，旦哥被爆料拍攝期間中暑暈倒地上，盧慧敏與導演誤以為他即興加戲，事後旦哥笑言指責他們見死不救！

旦哥堅暈倒被誤會做緊戲

旦哥憶起「暈倒」一事，在旁的Amy Lo忍不住爆笑！

眾人以為旦哥加戲。

Amy Lo坦言事後全部人嚇到黐線！

Amy Lo表示當時真係以為旦哥扮暈。

Amy Lo坦言旦哥成日即興，當時心諗「都幾誇張喎」！

Fish就好奇問旦哥，是否人人都以為你做緊戲？

Amy Lo與Fish好好感情！

鄭丹瑞、Amy Lo、Fish一同合照，好可愛！

旦哥憶述中暑暈倒當日在狗舍露天空地，拍攝一場他與Amy Lo打掃的戲份：「當時中午1點幾，又唔放飯，電影就係咁，導演又唔肯放飯，30幾度，好曬，嗰場戲我洗緊狗屎，突然眼前一黑，我就『嘭』一聲瞓低。後來有工作人員話我知，當時我同一個石級只差少少，如果一撞落去就『係咁先』！」旦哥又搞笑說：「嗰日我睇到人性嘅冷暖，尤其是呢個Amy Lo，得我哋兩個人做戲之嘛，我『嘭』聲瞓咗喺地，佢只係望住我！」Fish好奇問：「係咪以為你做緊戲啊？」旦哥說：「所有人都以為我仲做緊戲！因為之後導演同我講，佢當時心諗『做得幾好喎……點解仲唔起身？』」Amy Lo說：「係呀，事後我哋全部嚇到黐線！當時真係以為佢扮暈。（你唔會諗劇本冇呢場戲？）佢成日即興，我當時心諗『都幾誇張喎』，因為當時旦哥坐喺一張普通凳上，跌落地，普通人都係好大件事，嗰日佢仲包住條腰，有腰痛。當時一部攝影機拍住我，另一部拍住佢。佢跌倒之後，我心諗：『死啦，導演未嗌cut喎，我繼續演自己嗰部分。』因為我諗起周星馳嗰句『導演未嗌cut都要繼續演』！」引眾人爆笑。

Amy Lo在劇中演動物義工。

旦哥演一名為人火爆的獨居老人。

旦哥見到狗仔好開心！

Amy Lo、鄭丹瑞

旦哥拍戲時，中暑暈倒，令人擔心。

旦哥笑言唔好意思休息咁耐

此外，有驚無險，旦哥回復清醒，他笑說：「當時導演走埋嚟關懷備至問候我，然後俾咗兩個選擇我，一係依家繼續拍，一係休息一陣繼續拍！然後我自己會諗，如果我係導演我會點呢？我都係會叫演員繼續拍，因為時間好緊迫。」他笑言後悔：「我應該做返一個演員，堅持要返屋企。」他還反過來安慰導演。又說：「佢哋搵咗間房，有冷氣嘅，畀我休息、瞓吓，但佢哋不停入嚟問我『得未』。作為監製、演員，又做過導演，我好理解，所以真係唔係幾好意思瞓咁耐，結果嗰日我真係拍晒。唔好以為電影世界好殘忍，其實經常都發生！」

旦哥強調劇組好有責任心

Amy Lo透露其他工作人員亦有苦自己知，旦哥強調大家都好有責任心，一句「無事無事」繼續工作。他說：「香港拍電影就係咁，時間又少、成本有限！」Fish說：「所以希望大家支持香港電影，等大家成本高啲，令到中暑嘅人得到妥善嘅照顧！」