維港會：伙計送餐B女拍湯碗淥親手 母公審老闆要求埋單捱轟

家長與年幼子女外出用膳時，一不留神會易生意外。有家長在facebook群組發帖公審指連同B女一行4人到茶餐廳用餐，員工將麵食送上枱後，B女立即倒瀉熱湯，結果燙傷手腳和肚子位置，惟店員仍沒有反應，「事不關己一樣」。母親最後召救護車到醫院為B女治理，但她不滿茶餐廳老闆要求其同行胞姊埋單，又指對方「覺得係我哋單方面問題」，炮轟是「推卸責任」。帖文掀起熱議，不少網民都指樓主亦有責任看管自己的孩子，批評是「怪獸家長」；另有人認為雙方有責任，「但事主都要埋單」。

該家長昨午在fb群組「To Kwa Wan 土瓜灣之友」發帖，指她一行3人和BB女到一間冰室用膳，店員將一碗剛煮好的麵食捧到B女面前，大家未及反應，B女已拍落湯碗處，倒在手腳和肚子位置，但「呢個時候幾個店員完全無反應，冰水都無攞畀我哋，直至我哋要求先攞一杯畀我哋，期間語言冷淡，事不關己一樣，想我哋盡快離開現場。」

樓主其後陪同B女，由白車送院治理。她說，餐廳老闆後來要求胞姊埋單，「我家姐覺得非常唔滿意並且講出事發經過，老闆立即推卸責任，覺得係我哋單方面問題，無睇住小朋友令到意外發生，令我哋非常失望！」樓主在帖文又附註「發生意外無人會想！」、「店員連最基本色機意識都無」、「推卸責任，一句唔好意思都無」。

帖文在多個fb群組瘋傳，雖然樓主已刪除帖文，但仍引來大批網民炮轟，批評樓主疏忽，「確實係唔關店員事架喎，係自己冇好好睇住小朋友，怪得邊個呀」「希望個BB媽好好保護自己的孩子」、「自己唔睇實個BB 將責任推畀人哋，宜家真係好多人係咁，自己犯嘅錯就賴其他人」，有人亦質疑「如果個BB係媽媽抱住，點會發生？」、「睇完都覺得媽媽責任畀咗餐廳」。但亦有網民指，員工不應將餐點放在B女面前。