克勤踢波受傷網上鬧爆對手 被轟網絡公審

李克勤出名愛踢足球，近日他與晨㬢B隊到馬來西亞踢友誼賽時，就搞到「嬲嬲豬」！他在完場後在IG Story展示其傷勢，可見膝頭位置甩皮慘況，投訴對方14號球員踢得「一點都不友誼」，更指低涉事球員的外貌上載上網，一度展開網絡公審，並寫上：「就係呢條14號，我記得你。」結果在多個討論區掀起熱議，但大部份網民都批評克勤是網絡欺凌，「人哋球場上冇品 你網上冇品 半斤八兩」、「踢波甩皮有邊個未試過？」

克勤亦上載多張比賽期間的照片，雖然與14號球員起爭執的照片已被刪，但圈中好友仍留言提到事件，其中梁漢文（梁炳）就指「嘈起上嚟㖭」，克勤直言「有問候…」，梁炳再回覆「哦,只喺關心下對方，友善嘅問候啫」。另有網民撐克勤，「算啦！踢波啫，嗌烚幾句都會有，第二日瞓醒覺後就唔記得」、「好波自然成為對手既目標」。