維港會：港媽嫌菲傭講英文有口音 網民： 你咪又係港式英語

講非母語語言帶有口音並不出奇，但有媽媽就在網上公開批評其菲傭口音和語法「一擔擔」，並舉例指對方將「Apple」 讀成「啊蒲」、「Mango」讀成「炆go」，直言擔心自己兒子長時間與菲傭一起，「會學到佢啲衰野」。帖文掀起熱議，有網民認為「你自己咪又係港式英語，仲好意思笑人哋菲律賓英語」；亦有網民斥樓主「嗰幾千蚊，想請個十項全能」。

有網民在facebook群組「外傭僱主必看新聞訊息」發帖，問「其實係咪每個工人（菲）啲accent（口音）同grammar（語法）都係一擔擔？」。她舉例，菲傭將「Apple讀啊蒲/april、Mango讀炆go、Bath讀but，仲有好多，多不勝數，頭先聽到佢socks讀咗suck，忍唔住出post，我出聲糾正佢就西臉」。樓主指，BB與菲傭接觸時間較多，擔心BB會學到菲傭帶口音的英文，「我已經盡量抽時間去對返BB，講多啲野，真係好擔心會學到佢啲衰野」。

帖文引來不少網民批評，有網民認嘲樓主將菲傭當成「外籍家庭教師」，並認為「工人英文唔好係正常」、「 膠 post，唔通工人投訴你講廣東話唔純正咩」、「你真係有自信認為自己教嘅英文好啲？」、「樓主好厚面皮。4000元做工人又做埋老師。仲好意思嫌人發音唔正，你出4萬請人咩？」。另有網民指「 口音嘅嘢，我哋嫌棄佢，外國人都係嫌棄我哋，佢做好你最想佢做嘅工作80%已經ok，如果可以當然唔請自己湊返最好」，勸喻樓主應尊重對方。