【維港會】譚仔三哥轉新Logo 網民笑言「走辣變二哥」

日本烏冬連鎖店「丸龜製麵」去年先後收購譚仔及譚仔三哥（下稱三哥），一直都「無咩變動」。但今日，譚仔三哥率先喺FB公佈要轉全新品牌Logo！新標識貫徹以三哥做「嘜頭」，但棄用彩色畫風，改為用黑白樸實風格，有網民表示，新Logo「黑白紅主色，有丸龜味」，但亦有網民笑指「三哥而家要戴老花鏡」、「黑白色太搶，走辣變二哥」。

譚仔三哥今日在社交網頁Facebook發帖，指今日正式同沿用十幾年嘅舊Logo告別，以全新形象同大家會面！專頁表示，「新Logo以嶄新簡約設計融合舊有元素，除咗標誌性嘅辣椒之外，同時保留品牌靈魂人物三哥，包括佢嘅粗框眼鏡同埋誠懇笑容，令品牌煥然一新之餘，亦不失親切感。三哥更雙手捧上米線以表達對食物品質嘅執著，更代表三哥希望將香、麻、辛、辣嘅味覺享受帶到世界各地嘅決心！」更落hastag#認住黑色碗先係三哥。

有網民表示新Logo「有丸龜味」、「較順眼」、「有時尚感」。但亦有網民笑指新Logo「黑白色太搶，走辣變咗二哥」；亦有網民指「好明顯係換左個日本仔」。