藝人劉溫馨入票認購紅磡新盤擬上車

（星島日報報道）近年娛樂圈百花齊放，電視台之間競爭激烈，大台為留住人才，陸續有具潛質的演員成功上位，2013年參選港姐入行、多年來默默耕耘的劉溫馨（Virginia），一直擔任美女角色，參演《愛美麗狂想曲》逐漸入屋，更將在《白色強人II》擔任重要角色之一，曝光率持續上升，實力備受肯定，相當「慳家」的她一直努力儲蓄，希望35歲之前斥資最多800萬，購入1房單位上車，目標地區為九龍何文田。  

　
Virginia說：「我認為九龍區居住比較方便工作，當中首選何文田區，因為唔會好嘈，亦唔會好唔方便，附近又有好多名校。」她認為，何文田旺中帶靜，位處名校網，因此希望在區內上車，預算800萬購入1房單位，不一定要有梗廚設計，可以接受開放式廚房，但不會選擇開放式單位。「我覺得開放式單位太有壓逼感，始終有房間私隱度會高一啲，而且平時都成日煮飯，無間隔油煙會直接飄到衣服同上。」
擬斥資800萬上車

至於日常理財，Virginia沒有特別法門，「我唔識買股票嗰啲，所以平時都係直接儲錢。」除演員收入之外，十級鋼琴的她，平日亦會教導朋友子女，但都是興趣為主，只是象徵式收費。疫情下藝人收入大打折扣，因此Virginia租屋亦需要家人幫助。現時Virginia居於紅磡區1房單位，每月租金約15000元，她指很滿意區內民生配套，街市、超市及戲院等均齊全，但現時居所樓齡逾40年，存在老化問題，樓底亦不夠高，而令她想自置物業的關鍵是噪音問題。
置業首選何文田區

「屋企隔離左右成日有人裝修，每朝準時9點鐘鑽牆，真喺好嘈，令到睡眠質素好差，因為我哋做演員不時會拍通宵，需要第二日補眠，所以影響特別大，希望日後屋企環境夠安靜。」事實上，雖然現時租住單位有令Virginia不滿意的地方，但她自言相當「長情」，入行以來已住8年，相信暫時會繼續租住。
喜愛參觀新樓示位

自從有置業念頭，她平日會留意樓市，「我見最近二手樓平咗，但一手樓都仲係好貴，其實平時好鍾意去睇新盤示範單位，近期有參觀過紅磡新盤，仲有入票抽籤，但籌號太後，揀樓時已經無心儀嘅1房單位，同埋方向唔想對馬路，想向內園景多啲，所以無買到，其實如果真係有都要再諗諗，始終買樓喺好重要嘅決定，今次都係同親戚一齊試買樓個過程，感受下氣氛。」 Virginia又稱，現時爸媽及外祖父母都在日本居住，分隔兩地，其家人算是傳統派，覺得「一世人都要有自己屋企先安心」，所以都很希望她有屬於自己的物業。
疫下工作量減少

對於樓市走勢，Virginia認為現時很難上車。「疫情下工作減少，公司產量亦變少，希望能共渡難關，未來有更多商演及司儀的工作機會，其實我同大家差唔多，都係打工仔，後生都仲可以追夢，但係始終都要食飯，如果再過幾年依然樓都租唔起，需要屋企人幫手，好難過到自己。」