周吉佩捱眼瞓親接送女兒

颱風「蘇拉」過後，新學年終於正式開學，莘莘學子們都收拾心情開學，不少藝人昨亦親自接送子女，《中年好聲音》冠軍周吉佩（吉吉）向來愛錫子女，昨日親自駕車接送長女Imogen上學。吳日言（Yan）帶同細仔送大女Beatrice返學，讓囝囝預早感受校園氣氛。李璨琛大女Lucy由媽媽接送，開心揮手。陳琪一手接送三子女，幸好細仔澔錕剛升小一，三姊弟同校較易處理。
吉吉一早七點半駕車送愛女回校，他為囡囡開車門又揹書包，兩父女更在校外布景板合照留念。吉吉受訪時笑言「蘇拉」令全港停課，但對他沒太大影響，「上星期囝囝Jasper開學，囡囡未開學，原本要送囝囝返學，但打風取消了！臨急臨忙將行程調一調，反而打風無咁難搞，大家一早知道就留屋企休息。」他笑指囡囡性格開朗，知道開學覺得好開心，向他透露想見的同學或老師，享受上學樂趣。
欣慰幫手做家務
吉吉昨晨五點幾才睡，未幾就起身送囡囡返學，囝囝則由外母接送。問到工作忙是否也每日接送子女？吉吉說：「咁多年返學都係我親自接送，家人都會幫手接送放學，但今年家人身體唔係咁好，人手唔夠，所以囡囡都要搭校車返學！點解以前囡囡唔搭校車？因佢容易暈車浪，試過多次返學校就嘔，令佢驚咗！但無辦法，要佢重新適應。」吉吉指每年準備子女開學一定較辛苦，但囡囡開始長大會自己整理書包做功課，並幫手做家務，「佢會洗碗！所以現時無咁辛苦。（以獎品鼓勵囡囡做家務？）無！佢都鍾意，覺得有滿足感幫到屋企人做家務，可能真係大個女！」
吳日言忘買新鞋
吳日言（Yan）昨日舉家親自送4歲女兒Beatrice返學，老公Barry駕車一同抵達幼稚園，Yan笑稱自己大頭蝦忘記為囡囡買新鞋迎新學年。Beatrice可愛精靈，表示喜歡返學可與同學玩。Yan指開學日可讓家長進校上早會，她特地帶一歲囝囝到學校感受，希望日後讀該校，囡囡準備明年升小學亦已面試。
李璨琛大女李元元（Lucy）與Yan的女兒同校兼同班，Lucy與媽媽梁志瑩（Sophia）坐七人車返抵學校，Sophia沒下車，將Lucy交由學校職員帶入校園，Lucy開心揮手上學去。
陳琪三子女同校
胡諾言與太太陳琪的三名子女就讀保良局蔡繼有學校，全職媽媽陳琪管接送，昨日她先接細仔澔錕（Jayden）放學，再趕去接兩個女。升小一的Jayden開朗醒目，表示結識不少新同學很開心，午膳時更幫手派飯，小學比幼稚園多了不同科目，他希望加入乒乓球興趣班。陳琪指子女已開學兩星期，單是處理子女學業已很忙，因三個子女放學時間不一，升小五的二女芷悠課後進行排球選拔，大女芷苓讀中學兼接受劍擊校隊訓練，她指子女同校易處理，Jayden喜言有姐姐在同校，升小學新環境也不太緊張。