鄧麗欣開騷 見Cookies舊照喊唔停

鄧麗欣（Stephy）前晚在會展舉行《Therefore I Am》演唱會，幾位Cookies舊隊友好姊妹楊愛瑾（Miki）、吳雨霏（Kary）、區文詩（Angela）、陳素瑩（Gloria）及何綺玲（Elaine）亦有到場，Miki跟Kary更是自從七年前傳不和後首次同框，拍住坐睇騷更齊齊合照證破冰。
前晚多位圈中人如呂爵安、盧瀚霆、李駿傑、魏浚笙、唐詩詠、張繼聰、吳若希及戴祖儀等捧Stephy場。Stephy相隔16年再開騷，當她唱《姊妹淘》，螢幕播出她的童年照，她感動哭泣數度甩嘴。她全晚唱多首經典歌如《十分．愛》、《藍鞋子》、《電燈膽》、《他不準我哭》及《黑白照》等，又以鋼琴自彈自唱，當講到有朋友遠道來睇騷，她又再度哽咽，強忍淚水說：「今日我好叻，我綵排時喊到七彩，喊晒佢，我有意志力唔好喊，咁耐冇唱，喊就唱唔到，只係喊咗一首歌，唔緊要。」不過她笑言見到昔日與Cookies的舊照片就搞喊自己，又謂成長中有很多選擇，可能選擇後會後悔，但其實並不需要後悔，因為每個人也是自己的選擇。之後唱出《不要離我太遠》前，Stephy再次感謝歌迷的等待，希望自己的努力沒讓大家失望，並說：「我仲好鍾意唱歌！」
綵排第一首歌即喊
安歌時，Stephy表示很開心有5名姊妹來了，螢幕影着台下的「餅碎」，她說：「好開心見到你哋，Elaine好耐冇見！」當Stephy唱《最後一塊》期間，Angela更感動落淚。
Stephy完騷後受訪時指最擔心是喊的部分，因為無論在家中練歌或是真正綵排時自己都在喊：「唔知點解咁感性，可能啲歌過咗咁多年再唱，嗰種感覺係好大，一投入首歌度就會喊，好矛盾，最誇張係綵排時唱第一首歌已經喊。」提到唱《姊妹淘》時忍不住落淚，她指因為有已移民的朋友回來睇騷關係。Stephy好滿意自己的表現，認為已超額完成，並指今次演唱會的類型是自己很想做的，所以好滿足。對於她在台上表示曾後悔，問Stephy是否後悔揀錯人？她笑說：「又唔好咁敏感，人生有好多嘢會後悔，要學習無悔，因為當下選擇都有自己原因。」
Stephy指今次只開一場演唱會實在不夠喉，問到是否打算攻紅館？她說：「我相信喜愛唱歌嘅歌手，紅館都係一個夢，我自己都係，但相信一切都係一個安排，因為下年頭半年已經有好多電影安排，我都希望啲時間調得好啲。」
感動姐妹重修舊好
對於Miki與Kary難得同時出現，Stephy坦言：「都係，都幾耐，所以我頭先望落去台下見到佢哋一齊，我都好感動。（約Cookies齊人食飯？）要，我哋都不定時約食飯。」