霆鋒高空跌出貨櫃嚇窒衛詩雅

謝霆鋒擔任動作指導、聯同張學友主演邱禮濤執導的英皇電影《海關戰線》，有不少驚心動魄大場面，其中一幕霆鋒吊威吔跳爬到貨櫃頂，在45度高空傾斜後空翻墮下，衛詩雅在場睇到緊張直言：「嚇死我！」

當日霆鋒吊着威吔跳爬到貨櫃頂，未埋位的衛詩雅觀察霆鋒拍這場動作戲，在綵排時已表示擔心，霆鋒卻笑言：「這場已經很簡單，後半部分就要小心，會再辛苦點！剛剛有位武指因此脫臼，被送往醫院治理。」當霆鋒投入拍攝時，衛詩雅緊張到皺眉頭說：「好緊張，嚇死我，真的好危險！」
憶述《逆戰》危險場面
這幕槍戰場面還有另一艱險動作，在高空貨櫃傾側超過45度，靈活後空翻墮下跌出貨櫃，他只拍了三次，導演便收貨。之後霆鋒續拍從貨櫃箱高處墮下，跌在四驅車擋風玻璃上再滑下，用手捉實車頂邊緣，當他跌出貨櫃時，威吔的回力令他撞向貨櫃，霆鋒瞬間以手肘頂着，還笑言：「這些不算撞到！」早已見慣不怪。最後意外擦傷手指，他仍一派淡定，憶述從影以來最危險場面：「《逆戰》有一場發生喺馬來西亞監獄，我跳出嚟跌落車尾箱，真係好難！我諗唔算好高，大約有五、六樓層樓高，但係跳嗰個位置準繩度太重要，因為我要跳穿一個鐵皮，中間空位只得我一個人咁闊，如果我啲手伸出去就劏手，又如果我跳前跳後少少，就頸同腳都會撞到，而我從五、六層樓高跳落一個貨車車尾箱，又係前後左右多少少半呎都會甩手甩腳，由於空間狹窄，好容易撞到手腳，所以一定要跳得中！」
霆鋒露慈父樣「嫁女」
此外，霆鋒日前出席內地體育品牌創辦人丁水波的27歲二女丁佳敏的婚禮，原來霆鋒是新娘的契爺，他當日一身便服低調現身仍成為焦點，在場賓客大讚他沒架子，照片在網上傳開，網民笑指霆鋒一臉慈父樣，十足自己嫁女。