許冠文恨拍打戲 自爆試過做跳唱歌手

許冠文與黃百鳴昨日到尖沙咀為電影《誤判》謝票，對於電影在內地優先場的票房已近億，許冠文表示希望電影票房能收50億，又笑言本以為黃百鳴今次找他是要他拍《葉問5》，這樣便可與甄子丹過招：「想做奸角同好犀利嘅甄子丹對打，因為我鍾意跳舞，有底子可以打得好靚，點知原來唔使打，都有啲失望。（冇要求加打戲？）有問過可唔可以加法官畀人尋仇戲，不過唔得。」至於為何當初不做跳唱歌手？許冠文坦承都曾試過：「失敗咗，當年我同阿Sam（許冠傑）拍嘢都一齊唱過歌，唱咗3首歌後，周梁淑怡就叫我哋拍《雙星報喜》，不過後來佢叫我將唱歌部分交畀阿Sam，我集中搞笑就得。」笑指他可嘗試跟最近因唱《記憶棉》Hit爆的黃百鳴組男團，黃百鳴就表示只是玩，因疫情時所有娛樂場所都關閉，所以自己開了一個Band房：「許冠文都嚟過，佢喺冇觀眾嘅情況下都唱得好，所以周梁淑怡係『誤判』！」許冠文則認為黃百鳴做生意的天份比唱歌強。

提到電影《破．地獄》在內地票房過億，而《誤判》也有很好反應，許冠文希望香港電影能持續保持好的質素，因這樣才能引起同胞的興趣，黃百鳴則認為市場需要新鮮感，拍些未曾拍過的題材才會有驚喜。