【阿碌開咪】換新鈔遇怪雞邏輯

過去三十多年，一直是「獅子銀行」的「尊貴客戶」，的確方便，排隊也快捷點，到大型分行更有咖啡及報章、雜誌享受。

年尾客戶主任非常有禮來電：「曾先生，要換新鈔封利是嗎？我哋可以預早安排！」

「好呀！唔該晒，要三千蚊一百、三千蚊五十、四千蚊二十啦！」「得，你二月一日上來換啦。為免太多人，建議你早一點，唔使等，唔使逼！」

周一早上，準時九點，銀行一開就即進入，果然遲十分鐘就真係煩過「何非凡」，大量客人已殺到！客戶主任招呼入房，電腦上撳撳我戶口，話：「曾先生，你未填最新風險評估喎，填埋先啦！」小弟呢類「老江湖」，一聽就知此乃銀行套料，然後再推銷「金融產品」伎倆啦。「X小姐，咁啦，唔好阻你時間，不如我返屋企，再上網慢慢填啦，唔好煩你喇。」

「唔煩唔煩，有同事幫你，快好多！」此時即有位靚仔步入，禮貌周周協助我填個人的風險評估，結論係——保守（即他日唔使Sell你甚麼「高風險高回報」產品矣）。搞一大輪，才可坐埋櫃位換新鈔。「小姐，呢度一萬蚊現鈔，唔該！」

「曾先生，唔得喎，你一定要先由戶口提取現金，才可換新鈔㗎！」

「我正是剛剛由樓下提款機，於同一户口提一萬蚊畀你，點解唔可以用佢來換呢？」我覺得冇乜邏輯，於是據理力爭。

「……」櫃枱職員有少少為難：「唔好意思呀，呢個係公司政策，麻煩你，先簽字提款啦！」

各位，我揸住一萬元現金換新鈔，竟然唔接受，硬要再在同一戶口提款才可換。請問有冇「銀行家」讀者可解釋呢個究竟係乜邏輯呢？煩成咁。小弟當然費事拗，即簽名再提一萬元現金。兌換的一萬元新鈔，立即到手。

「曾先生，仲有乜可以幫到你呢？」

「有，請將我原本拿來換新鈔的一萬元，存回同一戶口！」

櫃員照做。我離開銀行，仍無法搞清究竟「獅子銀行」搞呢個擾客政策，有乜動機？

曾智華

阿碌開咪