阿碌開咪｜銀行快快回「善款水」

回水、回水、回「善款水」！

上周日中午，我隱隱聽見十萬計焦急、憤怒、不安、狂躁、火爆……聲音在嘶叫。

發生乜事？若你是馬迷，一定唔會問啦，因你必也是正在大叫、「狂呼我XX、XX」其中之一。

以股票做例。我買中電、港燈股票，因作為香港人，引以為傲。無他，以前住過的所有城市，無論號稱點先進，皆會久不久停電，搞到倒瀉籮蟹。做食肆的，更雞毛鴨血，食客點會摸黑冇冷氣繼續食吖？肯定MM聲之後鳥獸散。

香港的中電及港燈，令人驕傲，因絕少甚至近年未見過發生停電。給人專業、安全又安心感覺，絕對值得支持。表示欣賞最佳方法，成為佢哋股東！

講返上周日發生乜事，正是兩家主要銀行，包括滙豐及恒生，同時間網絡冧檔，搞到客人乜都做唔到，當然火噴噴。

更猛火為「忠貞善長馬迷」，數以十萬計，大部分皆習慣開賽前，用手機轉錢入投注戶口，以便搏殺（十之七八變善款）。點知從來未試過發生的「災禍」，突然降臨，正是手機顯示，銀行網絡發生問題，無法轉錢。

大件事，即係睇住就快開跑而無得投注！嗰種超級冇癮法，只有馬迷才深深理解，對其他人，講多無謂，蹝口水。

咁點？小弟就是最佳人辦，立即飛奔/車去附近投注站，真金白銀入錢落戶口，以維持每場有得玩。人同此心，結果去到投注站，嘩，N年冇見咁誇張，人人揸住疊現金，口中唸唸有詞，個個似在叫：「快啲快啲快啲！XYZ！」

最慘情有群「無奈人」，因未打齊三針，唔准進入，站在門口欲哭無淚咁款，垂頭喪氣似……

兩家涉事銀行，呢鋪冧檔真羞家，唔該公開宣布點補鑊，以息眾怒！

睇睇今晚，韋達配合希威森復出大開殺戒，「八心之威」、「量化歡騰」及「贏盡天下」全部跑強項兼磨到極鋒利，隻隻坐P望W，一於買過關！執筆時未知「對衡之星」能否補出，若能，一定要買呀，知冇？

曾智華

 

阿碌開咪