阿碌開咪｜美國冇人夠膽推動不准藏槍

美國雖為強國，但有不少問題，無論邊個做總統，也解決不了。例如槍械問題。　

美國基於歷史，憲法規定國民可以擁有槍枝。呢項權利，根本冇議員可以郁到，否則，肯定失去大量選票，連權位也不保，所以，冇一個政客夠膽/認真去推動美國人不准藏槍。

無奈地，只能在一宗又一宗自己人殺自己人的大案（尤其是校園槍擊案，青少年甚或兒童身亡）之後，循例譴責，示威抗議，或似拜登咁款，苦口苦面話：「I'm really sick of it！」然後乜都唔做。

美國乃資本主義社會，軍火生意屬天文數字收入，軍火商早早已操控大量選票，政治利益如老樹盤根，冇得移動。更甚，你叫美國人放棄擁槍權？尤其中部的牛仔及老粗，真係會同你搏命。

所以，縱使無奈，也得接受，美國槍擊案，日日有無辜人死，但仍是會天長地久地繼續下去。任何人去美國定居，就應要知呢種文化，自己執生防範。

今日執筆寫本欄，起因又見兩個華人在加州被槍殺，真係慘情。女的為牙醫徐麗麗，與丈夫在停車場泊車，突遭兩名匪徒持槍搶劫，徐醫生稍一反抗，立即被三槍射殺身亡。

另一宗，也在同區，一名五十二歲香港移民馮幹和，以送外賣謀生，則在家門口被搶車，再遭槍殺。兇徒下手毫不猶豫，非常冷血。

睇到馮幹和被槍殺案，小弟也有一次險過剃頭經驗。

話說上世紀七十年代在美國讀書，窮小子一名，當然要兼職，同時做幾份工，包括剪草、清潔、搬運及負責送外賣。

某夜拿着重重的中國菜外賣行呀行，不小心踏上一間屋的路旁草坪。突然聽見「咔嚓」長槍上彈聲音，跟着有人大聲嗌：「FXXK you, get off my lawn or I will kill you！」

喂喂，使唔使咁誇張呀？大佬，唔覺意踩到你馬路旁一塊草啫，咁就恐嚇要打瓜我？

就此，大學畢業後，頭也不回立即返港！

曾智華

阿碌開咪

編按原題為「我會打瓜你」