阿碌開咪｜人妻投注大法 又煞食又最準

每個賽馬日睇直播，我不會在大電視睇正正經經的大台節目，因為實在太四平八穩，淡如開水，有資料而冇趣味，犯下吸引力大忌。

賽馬，也是娛樂的一種，絕對不可太「官方」，否則就似N年前香港電台的失敗喉舌節目《奉告》，悶到抽筋，不少觀眾一聽到片頭音樂，立即轉身入廁所，甚至熄機，邊個會欣賞「膏藥」㗎？

有點好奇，究竟「官方」賽馬節目，係想多點人睇，定冇乜所謂呢？

咁小弟邊處睇直播？正是睇星島集團的《賽馬日在線》。兩年前面世時，我曾多多口畀意見，例如提議增加陳華棟老哥的「排隊馬」，兼且要派密探式人物在沙圈觀察，專報小道消息及花絮，增加吸引性，滿足八卦欲。

結果，「排隊馬」果然出現。不過，唔知點解今季消失咗，棟哥每場只畀一隻自己心水，過癮程度大大減低。

不過，幸而提供現場八卦料的亨利，仍然在陣，不時細細聲鬼鬼祟祟報道沙圈觀察。其中最煞食又最準確的，為創出「人妻投注大法」。即係點？因此君全天候躲在沙圈暗角，觀察有冇練馬師、騎師的妻子或親戚突然入場，甚至落沙圈打氣。若有，就是出擊先兆。因騎師皆男性，要威愛英雄感，若估計場場跑包尾，咁瘀，點會叫老婆入場？所以，老婆出現，尤其大肚都入場，一定有馬博，值得關注。

呢呢，上周三佢又一棍扑正，目及 到潘頓老婆及外母入場。另外，更罕見為冷門騎師嘉里太太也高調出現。

結果點？當然「人妻投注大法」又靈驗。尤其嘉里，爆出一隻十五倍冷門「勇眼光」，有跟進者，肥過肥豬仔矣。且看今晚亨利又有冇料到嘞。

自從冇咗拉叔後，潘頓隻手遮天任佢「開」。開「忽蟲」食白果得，好似上周日咁開「忽龍」連掃七W又得，吹佢唔脹，掹佢唔長。

馬會新主席，唔該做吓野，搵高手來港平衡一下好嗎？

今晚「俏芳華」梗膽，一於飛起潘頓「喜駿駒」，改要「連連歡呼」！

曾智華

阿碌開咪