疑荒山野嶺棄愛犬任雨淋幸獲救 漁護署未聯絡上狗主

近日天氣不穩定時有大雨，有網民透露，昨晚有一名可疑男子駕車帶同狗狗到荒山野嶺，巧遇民安隊隊員後躲避，至昨晚10時許，民安隊再於馬鞍山郊野公園燒烤場發現該拉布拉多犬單獨留在於郊野公園內，而且當時下著大雨，拉布拉多犬已全身濕透，其後民安隊已將將狗帶往愛護動物協會檢查。

網民在Facebook群組「馬鞍山之友」發文急尋狗主，稱昨日傍晚見到一名男子駕駛黑色寶馬房車沿馬鞍山村駛往鹿巢山車路一片「深山野嶺爛地」，放低隻狗仔拉布拉多「係荒山野嶺痾屎痾尿，仲要一見到班民安隊隊員就即刻拉隻狗上車，唔俾佢痾埋篤屎」。

網民指，至昨晚約10時民安隊隊員在馬鞍山郊野公園燒烤場發現該隻狗，當時正落大雨，「隻狗被發現時全身濕哂，係凍冰冰嘅山嶺度飲緊地下啲污糟水，身上得返條狗鏈，冇牽引繩，最後民安隊帶咗你隻狗去愛護動物協會」。

網民苦心勸諭，「我相信你同屋企人而家應該好擔心隻狗，快啲去愛護動物協會認領返你屋企隻狗啦。下次唔好帶隻狗去咁遠嘅荒山野嶺大小便嗱！」。最後網民忠告「如果你真係有心遺棄隻狗，我寧願你鎖佢係街都好過咁滅絕人性送佢入荒山野嶺等死」。

其他網民批評狗主在惡劣天氣下任由狗隻在山頭流浪，「點解而家日日都見到棄養或虐待動物嘅新聞，真係好難過，點解啲人類越來越冷血冇人性」、「希望有人認得狗狗是邊個，搵返佢出嚟」。

據Facebook《香港動物報》指，現時拉布拉多犬由愛協交漁護署暫住，漁護署至今未能聯絡到晶片主人。愛協強調已在送交文件中列明，如主人選擇棄養或漁護署未能找回主人，愛協願意接收狗狗，再為牠安排領養。

建立時間：1552
更新時間：2205