【維港會】孕婦電話跌巴士凳底 好心男不怕污糟幫撩翻

懷孕時行動諸多不便，相信媽媽們都深有體會。有孕婦近日搭巴士時，不慎將手機跌落凳地，但又不方便彎低身執。苦惱之際，一位好心乘客主動伸出援手，幫她撩翻手機，更細心遞上消毒紙巾抹電話，令她非常感動。

有網民在「將軍澳主場」Facebook發帖指，多謝一位296c線好心乘客。網民指自己「操身大細」，她早上搭巴士時，起身正想落車之際，電話竟然跌落地，更攝入前座位凳底的罅隙。「前座位先生真係好好心，唔怕污糟，幫我伸手入seat位條罅，『了』（撩）翻部電話出嚟」。

網民指，車長也有專門開慢讓她執電話，但由於最終趕不及落車，她就坐低直去尚德，途中這位好心男子更細心地遞上消毒紙巾，讓她抹乾淨電話。「呢位在尚德總站下車的先生，我真係好衷心向你再説多聲：唔該曬！多謝你！」

不少網民都讚好人好事，「疫症當前，肯撳lift已經好好人，何況執電話」、「男人應有的風度，大住肚冇人幫都唔好亂來，部車一刹停都幾危險」、「真係要小心，巴士下層雙座位中間嗰條罅都好易跌電話落去，重要好難執得到」，另也有人指體貼的巴士車長也值得稱讚。