【懷念琴姐】因為媽媽梁小玲關係趙希洛童年曾收琴姐古裝戲服

2021-01-26 16:00

李香琴昨晚設靈，不少圈中好友無懼疫情到場送別，趙希洛(Candice)亦隨母親梁小玲現身殯儀館。因為趙母曾是TVB藝員，活躍於70年代，演出過不少劇集，亦是《歡樂今宵》台柱，跟琴姐相當老友，就算舉家移民去澳洲，琴姐之後都有去澳洲探佢。

因為媽媽關係，趙希洛自細就識得琴姐，佢仲喺IG Post出幾張童年相，其中一張是琴姐正在為童年嘅佢梳頭。趙希洛留言：「再見琴婆婆，我永遠不會忘記你，感謝你在我童年時，一直對我親切嘅愛護。」另外由於童年趙希洛好鍾意睇古裝片，琴姐仲特登造咗一件古裝童裝戲服，更專誠帶去澳洲送畀佢，趙希洛表示當年好開心，仲好記得要花好多時間穿上，着完又唔捨得除低。「絕對係我最快樂最喜歡的童年回憶之一。」最後，Candice留言，「We will miss you，琴婆婆。」