被Model馮鎵瀠公開追還錢 張致恆周身街數貼文「賣小強」

年半前，曾被爆一腳踏五船的張致恒（Steven）跟Fans雯雯結婚並誕下兒子「天寶」，由於賤男形象極差令他冇工開，要養家嘅Steven被指要周圍借錢，關智斌及鄭希怡亦共借出10萬元給他解困。



爭人錢又冇能力搵錢，但曾坦認「性上癮」的Steven唔肯做安全措施，老婆於去年六月再為Steven誕下幼子天牧，當時Steven誓神劈願組織四人家庭會後修心養性努力工作養家。


36歲的Steven最近被爆出欠下周身債，Model馮鎵瀠（Naomi）昨晚在IG的Story開名鬧爆Steven未還錢，因為無限期停業，好窮的Naomi留言Tag Steven:「你係唔係諗住唔還錢？你講過分期還？年半多，一毫子都無還過我，之前仲unfollow我ig。」女方接住Post的Story還透露自己真係好窮，爭佢錢嘅人唔該快啲還錢。

Steven在社交網撰長文回應欠債事件，他指一年多前因自己做錯事，令到自己工作完全停頓，當時完全冇收入，迫於無奈問好多朋友借錢，也好感恩有好多朋友出手相助先捱得過一段時間，也試過搵過好多工，做過好多不同行業。他說：「疫情影響底下被炒過好多次，我有努力工作搵錢，希望可以支撐到屋企之餘仲可以還到錢俾朋友，但係而家的路實在太難行，工作完的收入都唔夠屋企開支，想淨少少錢還俾朋友都唔得，令到有好多朋友都好唔開心，我喺度要同所有借過錢俾我的朋友道歉，一直以來我都還唔到錢俾你地真係對唔住，喺嚟緊嘅日子我一定會盡力去工作還錢俾你地！」

Steven又解釋傭人在兩年前聘請，太太所買的電器以電話儲下的積分換取，而兒子所穿的服裝不是名牌，玩具和衣服大多是外婆及朋友送贈。再指因為養了三隻狗不能跟父母住屋邨而租住村屋。他說：「照顧一個家庭壓力非常之大，我亦都好努力去重新做人，只係希望大家可以俾啲機會我同埋俾啲時間我，我一定唔會再令到大家失望！」晒可憐「賣小強」的貼文亦獲關智斌畀Like。