【疫下難識人】唔敢約心儀對象食飯　方力申認拍拖過於理智

方力申（小方）早前為阮小儀主持的香港開電視節目《小儀與13型男》擔任約會對象，節目中，為配合小方熱愛運動的喜好，小儀特別安排跟對方大玩TRX（懸吊式阻抗訓練），兩人大擺親密甫士，小儀以「男上女下」般躺在地上與小方大玩「女朋友視角」，她說：「同佢識咗咁多年，喺鏡頭前有冇試過咁親密？係少啲嘅。拍電影，導演都唔會擺我哋做一對，呢啲動作頭先即席諗，佢又唔介意，純粹佢又信我、我又信佢，係一個友情Moment，感覺有趣！」

問到可曾跟另一半一起做運動？小方點頭表示有，但笑言並非好事：「細個有同女朋友一齊做運動，但都鬧交收場，自己對運動有要求，會教對方咁做先啱、咁做唔啱，人哋就會拍枱、掉毛巾話唔做喇，所以同女朋友做運動係咪會好Sweet呢？我覺得未必係。」之後小儀又獻上Kpop舞給對方作驚喜，惟拍攝前才學了幾日的她雞手鴨腳，把小方嚇到目瞪口呆並口窒窒說：「好有誠意，但點解、點解、點解要跳舞？」場面爆笑，事後小方稱尊重對方為他做的一切，但謂運動員出身的自己要求較高，自然會跟女朋友講「差啲喎」，換來不理想的效果。

其間，不時強調單身已久的小方大呻疫情下好難識人，小儀提議他透過交友App識人，但小方笑道：「你玩我咩？App要擺自己張相，記者咪知！其實我好Old School，讀書時係游泳運動員，喺泳界好多家長識，佢哋就等於之後嘅『狗仔隊』，嗰時已經地下情，到入行時係『狗仔隊』最旺嘅時期，自己又係地下情，慣咗喺呢件事上好緊張，就算而家對個女仔有好感，都唔敢約食飯，一約就會畀人覺得『出擊』咁。」並謂自己拍拖最大缺點是過於理智，至於擇偶條件？他說：「首選性格隨和。」