【10秒KO喎】揚言要教訓「賤畜」林作　鍾培生驚打死人想搵殯儀館贊助

百億富三代鍾培生和林作的「百萬擂台戰」記者會，今午在前者的淺水灣大宅花園舉行，吸引大批傳媒到場採訪，場面墟冚！日前，林作公開獲母親王莉妮批准迎戰的片段，片中林媽媽更力撐囝囝：「我一定支持你，打爆佢，你一定要爭氣，贏番嚟！」而今日她也親身到場支持，林作母子甫抵達即借廁所，後又跟媽咪在花園視察環境。

席間，林作全程表現嘻皮笑臉，鍾培生則對他不屑一顧，幾乎冇正眼看過林作，仲不時爆粗大罵林作，火藥味濃！鍾培生稱2018年首次參加拳賽後，林作是其對手之中最弱的一個，但自己也會積極備戰，又寸爆林作：「如果我認真打，10秒就可以打低佢！」不過，鍾培生表示會拖慢來打折磨對方，他續道：「我會喺台上揼佢、羞辱佢，先打佢個嘴再打身體，等佢俾人抬出擂台！」

雖然雙方口水戰超過半個月，但二人今日先第一次見，鍾培生繼續攻擊林作：「望住佢嘅態度、衣着同髮型，成Pat屎咁，好難唔燥，個個都想打佢！」對於網民質疑他們夾份做騷，鍾培生強調：「之前已經解釋過，點夾都唔會同垃圾夾。我媽媽同嫲嫲都有幫佢唸經，叫我唔好打死人，鍾家做好多善事，但我唔會就住嚟打，我本來想搵殯儀館Sponsor，但而家覺得搵輪椅更好！而且佢經常欺負弱者，佢嘅舊同事都有向我訴苦，佢係賤畜係賊，我係教訓小動物。」

賽事將由鍾培生的公司負責製作，目前正邀請不同的拳手參與盛事，又會邀請知名藝人和樂隊表演，故到時會售票及安排觀眾入場觀戰，收益將捐給不同的慈善機構。鍾培生指，不排除邀請林作女友裕美做表演嘉賓，問到有否和解機會？他說：「有咩好傾？佢學識做男人之後，我都可以嘗試了解佢。」至於萬眾期待的「林鍾一戰」暫定於9月舉行，賽事以4回合，每回合2分鐘進行。