【維港會】欠20間財務公司債親戚亂填諮詢人 網民家遭淋油束手無策

網民在網上討論區「親子王國」發文求助，指家門不幸，有個「人渣親戚」借完又借，之前已經幫了還幾次債，近期又借了20多間財務公司債務及高利貸，亂填諮詢人還潛逃，「成家日日收電話同WhatsApp、短訊追數，前幾日屋企仲俾人淋紅油」，面對追債滋擾網民每日心驚膽跳。

家住公屋網民解釋，財務公司無簽名、無確認，「個衰人淨係報我哋個名同電話，個啲財仔就借俾佢，真係好陰公」。之前屋企人想欠債親戚重新開始所以一家人才幫手，「點知佢一錯再錯，我父母又驚但又唔想離開間屋，咁先煩上加煩，我都好想搬，宜家裝定CCTV」

她又悲嘆，「已報警但好似都幫唔到手，啲收數係咁叫我哋幫債仔還，唔還就話要搞我地。有大又有細，好痛苦，日日擔驚受怕。」她指，諮詢人雖然無法律責任，「但個啲財仔都唔知係第幾缐，佢哋都唔理，一句話搵唔到佢就搵你哋，成家被害得好慘。」

她形容，「每日喊，我又成日食唔到嘢，個胃又頂住。報咗警，搵房署搵社工搵區議員，明白不是一時三刻可解決既問題，但我哋發生事...現在都無人覆，好無助」。

不少網民都束手無策，建議「無陰公，同情你，可以搬就搬啦」、「你要報警，話有人淋紅油，佢哋會畀張報案紙你。再有人攪事，你只有不停報警，但其實警察係幫你唔到，除非人贓並獲。一定唔可以還錢，$1都唔得。因諮詢人本身係唔需要上身，佢哋係要令你驚，咁就逼你幇手還，但當你還咗一次之後，條數就要揹上身」。

有過來人提出，「之前試過, 欠債人係我姨仔。好彩我有朋友係做律師事務所，佢叫我收到電話短信，全部記低交畀佢，佢幫我逐個收數打去，話佢哋知我係唔知債仔喺邊亦唔會幫佢還錢。問收數攞FAX NO，律師事務所會出FAX畀佢向債主交代。朋友話佢哋成日都會有啲銀主盤新業主畀舊業主啲收數騷擾，律師事務所就會咁做。幾個星期左右就大致無晒啲收數電話打來，之後都仲有啲零星收數，我照畀朋友搞， 大概一年多啲就完全無晒。樓主有人上門淋油應該都報咗警， 警察都會加強上樓巡邏一段時間，但就唔會點跟進」。

帖文轉載自「親子王國」《好痛苦，被寫了借錢諮詢人》