【粉絲增一枚】進軍國際第一步殺入維園　肥仔@ERROR晒舞技冧家傭姐姐

2021-03-15 14:30

ERROR隊長肥仔（梁業）今年1月尾首度「單飛」推出新歌《Lady Killa》，MV中他更收起一貫搞笑形象，化身「Chok爆型男」，與20多名舞蹈員大跳韓式勁舞，反應不俗！不少網民都大讚製作認真，水準媲美電影，又指肥仔唱得又跳得，好有型，不過亦有人嫌唔夠喉，希望他再跳多啲。為滿足Fans期望，肥仔上月再推出足本Dance Version影片給大家觀賞，片段仲以一鏡到底方式拍攝，深得網民喜愛。

昨晚，肥仔在IG分享一段在維園大跳《Lady Killa》舞步的影片，還找來一名年輕男舞蹈員共舞。片中可見，一群外藉家傭姐姐在球場席地而坐，肥仔與男舞蹈員就背向人群對鏡頭起舞，其間全場姐姐如常做自己嘢，完全無視二人，當中只得一位家傭姐姐眼也不眨望實他們，十分搞笑，肥仔留言打趣道：「為咗《Lady Killa》可以打向國際，所以今次踏出第一步去Kill d（啲）外籍人士。你見到佢哋見到我哋都舔晒脷就知我哋咩料。」其實會唔會係姐姐們食飽舔脷咋？一眾網民即紛紛笑指：「Kill唔到喎」、「後面班人Ｏ晒嘴」、「皺晒眉頭喎姐姐」等，又建議他們邀請家傭姐姐一齊跳：「下次教埋啲姐姐」、「應該叫埋啲遮遮一齊killa呀嘛」、「可以去晒香港所有區跳一次」、「覺得啲姐姐好好運」。