1歲B仔老竇身份超神秘　楊思琦被寸一人分飾幾角：好搞笑

楊思琦和羅霖為節目《Master's Talk師父有請》擔任嘉賓，對於二人沒有另一半分擔責任，主持人麥玲玲也大感佩服，她形容羅霖是嫁入豪門，可惜外界不太看好，羅霖說：「坊間好多朋友真係好多打賭，睇吓結婚定會分手。我都冇諗過同佢結婚，對佢初初冇乜感覺，因為佢唔係我鍾意嘅類型，當初佢話追我，我係好驚，因為當時啲八卦雜誌話佢係公子，又同其他娛樂藝人一齊，所以初初都係避開佢，不過後來一大班朋友活動就成日見到佢。」

談到獨力湊大3個兒子，羅霖認為看上去很有型，但都是為世所迫，「離婚唔係一朝一夕，我忍好多年，都希望啲仔大啲先，直至佢超越咗我底綫其中一點，所以就離婚。（贍養費？）離婚一刻贍養費係零，我負責小朋友生活費，前夫負責小朋友教育費，點知過半年佢同我打官司，想分我一半錢，學費佢都只想畀部分，打官司真係好心力交瘁。」

至於2012年，傳為「空心老倌」吳帥誕下女兒楊卓穎（Krystal）的思琦，表示當年已有生BB的打算，無奈後來跟前男友吳帥產生了些問題才分開，她說：「唔係大家想像咁……件事好簡單，我唔會覺得幾震撼，當時唔敢講，面對傳媒係逃避心態，怕講多錯多。」並謂試過返內地工作至凌晨3、4點回港，楊母才告知囡囡有份功課未完成，她形容是晴天霹靂，於是火速為囡囡完成後才去休息。

那麼離婚後會否期待「第二春」？思琦說：「頭幾年真係唔會諗，唔會有心情出去約會，不過當時個女有話想要弟弟。（女兒會否問起爸爸？）佢冇問，但佢話過想要個爸爸，所以現時好開心，亦叫現任丈夫做爸爸，不斷叫爸爸，佢恨咗好耐。」她前年忽然再懷孕兼結婚，細仔Kody於去年初出世，不過BB爸爸身份一直成謎，思琦僅透露對方是圈外人，不曝光亦是尊重對方的決定，她說：「我入行都廿年，由細睇到我大嘅傳媒，有咩都可以講，不過佢話唔想講我咪配合。（呢個世界上唔多人知？）係呀，網上話虛擬老公，話我自己一人分飾幾角編出黎，咩大話冚大話，我覺得好搞笑，總之而家生活好開心。」