獨自兜風電單車死火 張繼聰流落荒野向謝安琪求救

張繼聰近年愛上揸電單車，不時相約森美和張振朗等好友假日出車，有時更會一個人去兜風，享受男人的浪漫。一個人獨遊雖然有型，不過意外發生時會相當無助。張繼聰昨日在IG分享照片，透露獨自出車時遇上電單車死火流落荒野，最後更要向家人求救。

昨日黃昏，阿聰獨自去兜風，怎料去到荒山野嶺時，電單車突然死火，點撻都冇反應，加上手機收唔到訊號，他留下電單車，無奈地行了約300米，走到有訊號的地方聯絡車房師傅，看看如何處理，之後回頭嘗試修理電單車，可惜未能成功，反覆嘗試三次後最終放棄，最後唯有叫拖車，再找家人來接他。

不過今次「荒山野嶺死火記」未有影響他對電單車的熱愛，在反覆嘗試修理電單車時，亦不忘為愛車拍照，Hashtag表示：「電單車壞咗唔緊要」、「最緊要有多兩部」，最後呢句應該畀佢老婆睇嘅。今次來荒山野嶺拯救阿聰的家人，當然是指老婆謝安琪，她在阿聰的貼文搞笑留言：「你屋企人咁好嘅，一收到電話就放低晒手頭上嘅嘢，立即揸車去荒山野嶺嗰度接返你。」阿聰亦相當識做，馬上回覆：「謝主隆恩」，算佢識講嘢啦。