與張繼聰肉帛相見攬埋一嚿 Chilam唱《Baby Shark》被考起

抗疫電影《總是有愛在隔離》兩位男主角張智霖（Chilam）及張繼聰（Chilam），在戲中上演一幕「肉」帛相見搽蘆薈油，Chilam直言：「幫人按摩都唔容易，特別阿聰啲肌肉咁厚⋯⋯真係每個行業都有艱難嘅地方。」阿聰就話：「好在同Chilam熟，所以犧牲色相都唔尷尬，如果同其他冇咁熟嘅人，可能會就住就住。」
提到犧牲色相，也不及浸熱水浸足半日，阿聰表示：「以為有桑拿戲好爽，點知浸完冇得按摩，同埋我覺得我哋好似打邊爐個爐入面嘅雜菜，出晒煙！」Chilam表示同意之外也補充：「我哋浸到暈暈地，其實一班負責拍攝的劇組人員同我哋一齊浸，佢哋仲辛苦。」

不過最大挑戰，就係其中一幕要唱大熱兒歌《Baby Shark》氹細路，兩人異口同聲都話好難。阿聰笑言：「作為歌手唱開啲複雜嘅歌，要唱呢啲簡單嘅旋律係有難度；不過Chilam辛苦啲，冇乜點聽過呢隻歌，我聽呢隻歌已經聽咗過億次！但呢場戲其實我哋係襯托個小朋友。拍呢套戲都好開心，可以試到好多唔同嘅嘢，飛車、打鬥、唱歌、捽油等等，平時好少一套戲會試到咁多嘢！」
講到飛車打鬥，戲中兩人本為仇家，一見面就鬥過你死我活，有一幕講述兩人打鬥後逃走，阿聰因趕上車要飛身入車，為親身上演這一幕，即場跟武術指導學習。他說：「真正危險嘅動作，係靠專業嘅武術演員，我試做呢個飛身既一小個動作，希望為套戲出一分力。」