「lunch哥」涉藐視法庭押後訊 官提醒指控嚴重「佢都幾出名㗎嘛」

人稱「lunch哥」的中六學生李國永及六旬退休女保安員疑在去年8月一宗死因聆訊休庭時，在法院外以粗言穢語辱罵證人，早前遭律政司加控刑事藐視法庭罪，案件今在高等法院提訊。由於二人的法援申請被拒，今日並無律師代表，但李將就法援署的決定提出上訴，故申請將本案押後再訊。陳慶偉法官應其要求，押後本案至8月2日，但提醒：「呢個係一個非常嚴重嘅指控，同埋係非常嚴重嘅案件，請你哋真係認真處理」，並謂：「lunch哥都幾出名㗎嘛，唔係一個嗰一日淨係做一件事嘅人嚟㗎嘛」。

李在庭上表示，其上訴申請已排期至6月24日開庭處理，申請押後案件。陳官反問：「如果上訴都唔批呢？」，又提醒他「真係要諗清楚」，若審訊結果不如理想或須支付堂費，「可以係唔細嘅數目」。律政司一度反對本案押後，認為李並無合理原因提出申請，但陳官反駁：「合理原因咪就係要上訴囉」，終批准本案押後至8月。

李的父親一度稱，李患有自閉症及過度活躍症，「驚佢答辯有啲問題」，希望可代為抗辯。陳官拒絕其要求，直言：「高等法院處理唔少案件，好多被告都話自己精神有問題，但唔代表可以抗辯成功」，又認為：「如果咁嚴重唔會讀到中六㗎嘛，中六都有返咁上下㗎嘛」。

李父又稱，涉案文件全以英文撰寫，內容艱澀，希望法庭能提供譯本。陳官則稱：「其實好簡單嘅啫」，「返去睇返嗰4段片，死因庭外你個仔用粗言穢語辱罵證人，妨礙司法程序，構成刑事藐事法庭」。李父聞言慨嘆：「（案發）過程唔超過5分鐘，都唔明點解搞到咁嚴重」，「小事化大」。陳官反指：「唔係小事㗎我話你聽」，「你認為係濕碎，但後果可以好嚴重」，並提醒本案在高院處理，嚴重性不言而喻。

另外，65歲退休女員安賴瑞英則透露打算認罪，「都係自己做錯囉，打算認囉」，並謂：「誤信咗網上假消息，一時衝動」。

法庭已就本案頒下匿名令，禁止傳媒披露案中所有證人的身份，包括事主及警員證人。