【獨家】龔柯允童年被約束好憎老竇 李璧琦單親成長仲未原諒父親
2021-04-15 22:17 
由王炳雄執導、李璧琦（Becky）、龔柯允（Karen）及陳友主演嘅福音電影《等一個擁抱》多度延期下終於在本月15日上映，因為故事改編自真人真事，優先場的觀眾感動到喊晒。於單親家庭成長嘅李璧琦形容片中情節，有啲似人生寫照，所以睇劇本時手都震；至於來自大馬嘅龔柯允細個時同家人關係唔好，跟片中一樣好嬲爸爸。採訪：方騫平 攝影：譚壹致 髮型：Simon @ leighton aveda(李璧琦) 服裝：noveltylane(李璧琦)、Novelty Lane(龔柯允)
電影講述陳友年青時因有第三者而拋妻棄女，後來患上腦退化症與女兒重拾父女情懷。雖然有好多內心戲，但導演大讚Becky拿捏得好好，有場話佢喺門口聽到「父親」陳友同「妹妹」龔柯允講故事，Becky真係喊到幾乎崩潰，好入戲。
代入好多真感情
現實中，Becky爸爸於她十歲時離家，所以睇到劇本時好似講緊自己，甚至知道下句對白係乜，內心變得好激動：「我唔知將來會唔會原諒爸爸，呢個人生故事仲未發生，𠵱家先留白，我好相信每個人內心深處，放咗個記憶盒子，但未必夠膽打開，我相信個天自有安排。」另外，曾參加《全民造星III》嘅馬來西亞歌手龔柯允首次拍香港電影，她緊張到留守喺大澳外景場地10幾日培養情緒，加埋親身經歷，最後都拍出感覺：「因為爸爸管教嚴厲，細個時受到約束，唔准我拍拖同埋結交吸煙講粗口嘅朋友，當時好痛苦，中五過後即離家去吉隆坡讀書，所以我將當年不滿爸爸嘅情緒發洩喺友哥身上，對友哥『倔擂槌』，導演話我最叻係嬲爆爆同埋急住跑！」
最新回應