【独家】龚柯允童年被约束好憎老窦 李璧琦单亲成长仲未原谅父亲
2021-04-15 22:17 
由王炳雄执导、李璧琦（Becky）、龚柯允（Karen）及陈友主演嘅福音电影《等一个拥抱》多度延期下终于在本月15日上映，因为故事改编自真人真事，优先场的观众感动到喊晒。于单亲家庭成长嘅李璧琦形容片中情节，有啲似人生写照，所以睇剧本时手都震；至于来自大马嘅龚柯允细个时同家人关系唔好，跟片中一样好嬲爸爸。采访：方骞平 摄影：谭壹致 发型：Simon @ leighton aveda(李璧琦) 服装：noveltylane(李璧琦)、Novelty Lane(龚柯允)
电影讲述陈友年青时因有第三者而抛妻弃女，后来患上脑退化症与女儿重拾父女情怀。虽然有好多内心戏，但导演大赞Becky拿捏得好好，有场话佢喺门口听到「父亲」陈友同「妹妹」龚柯允讲故事，Becky真系喊到几乎崩溃，好入戏。
代入好多真感情
现实中，Becky爸爸于她十岁时离家，所以睇到剧本时好似讲紧自己，甚至知道下句对白系乜，内心变得好激动：「我唔知将来会唔会原谅爸爸，呢个人生故事仲未发生，𠵱家先留白，我好相信每个人内心深处，放咗个记忆盒子，但未必够胆打开，我相信个天自有安排。」另外，曾参加《全民造星III》嘅马来西亚歌手龚柯允首次拍香港电影，她紧张到留守喺大澳外景场地10几日培养情绪，加埋亲身经历，最后都拍出感觉：「因为爸爸管教严厉，细个时受到约束，唔准我拍拖同埋结交吸烟讲粗口嘅朋友，当时好痛苦，中五过后即离家去吉隆坡读书，所以我将当年不满爸爸嘅情绪发泄喺友哥身上，对友哥『倔擂槌』，导演话我最叻系嬲爆爆同埋急住跑！」
最新回应