4演李小龍體會深 陳國坤感謝周星馳提攜

陳國坤作客楊盼盼主持的訪談節目《盼你賞面》，席間大談對偶像李小龍的感受。雖然未見過李小龍真人，但因為一套《精武門》，他就自此對李小龍著迷。陳國坤說：「龍哥（李小龍）對我由細到大嘅影響都好特別，細個因為佢，我會周身郁，好有表演慾，到大個咗開始睇佢嘅書，慢慢會鍾意佢嘅世界、佢嘅價值觀，我個人都變得好有正義感。」
入行多年以來，陳國坤演過4次李小龍角色，其中《李小龍傳奇》令他有最大體會，「拍攝7個月，好享受，演了李小龍一生，更加了解李小龍的其他細節，感覺就好似佢陪住我拍咁，對佢嘅了解都一日比一日熟。拍完《李小龍傳奇》有少少憐憫佢嘅感覺，發覺佢原來好無助、高處不勝寒。」
至於在《葉問3》、《葉問4》中所演的李小龍，陳國坤說：「《葉問4》係我所演過的李小龍角色中最滿意嘅一個，記得之前《葉問3》，拍完一場踢腳戲之後，行過聽到八爺（袁和平）講『小龍（陳國坤花名）啲腳都係差啲』！我聽到好大打擊，即刻同八爺講對唔住，話我會將腳練好。」

節目中陳國坤又感謝周星馳，能夠參與《少林足球》、《功夫》令他知名度大增。他說：「簽咗8年，拍咗兩部電影，比好多人拍廿、三十部更有用，首先是得到人哋對自己嘅認知及認可，而且在拍攝過程中又吸收到好多嘢，兩套戲嘅角色都令觀眾有記憶。」