【So Hot】懷孕8個月手腳依然好瘦 沈卓盈拖老公影透視大肚相

沈卓盈（Jess）沉迷玩社交網，事無大小都要放上網同人分享，大肚咁大件事當然日講夜講，早前宣佈一索得男嘅佢昨日在社交網狂晒喺沙灘影嘅性感大肚相，出完一個Po再一個Po，分別係透視單人照，有全身有半身仲有躺沙灘嘅，清楚見到超完美大肚婆身形，老公仲喺身後攬住佢個肚，Wow，好Sweet。

仲有一套靚Body Suit，Jess露背又露腿，仲拖住老公一齊影，可能富商老公唔係好慣，笑容有啲牽強，難怪佗8個月肚嘅Jess咁自信，因為大肚婆嚟講，Jess手腳依然纖瘦，五官亦冇走樣，靚靚大肚婆無誤。

Jess留言大讚老公係最好嘅靈魂伴侶及爸爸，並分享佗B感受，「孕育生命的過程真的很奇妙，令我深深感受到當媽媽真的很偉大，每一周都要留意住寶寶的成長，經歷了初孕的不適，胃口的轉變，身體的變化，皮膚質素的變差，擔心寶寶的發展，時時刻刻提醒自己要吃得健康，也要好好管理因荷爾蒙變化令我們不穩定的情緒，這一切都好不容易啊，但只要聽到寶寶一切安好，和感受他在肚裏面活躍踢動時候，這些辛苦都不算什麼了，這個美妙孕期的變化和過程真的一定要好好記錄低，因為當媽媽令我們變得更勇敢呢！」好多字，都係睇返相算嘞。