論盡BBQ仆親左眼撞到瘀　車婉婉緊張帶囝囝去驗眼

車婉婉早年以42歲高齡誕下兒子Justus Quinlan（BBQ），並不時於社交網以「高齡日誌」為題分享育兒經，轉眼已5歲大的BBQ精靈又活潑。昨晚，婉婉於IG分享了囝囝眼角現瘀青，以及接受視力檢查的相片，她透露「論盡」BBQ刷完牙冇睇路Kick親，搞到左眼被硬物撞到瘀晒，婉婉寫道：「Q MaMa聽到佢落地嗰下聲音好大，心諗今次大鑊啦⋯⋯抱起佢嘅時候見到隻眼有少少血，好驚呀！當然，要保持冷靜，即刻敷冰先！唔洗（使）講，BBQ喊到失晒聲，非常淒涼，好可憐，真係好心痛⋯⋯」

雖然BBQ喊飽就瞓，但愛子心切的婉婉卻成晚囉囉攣，擔心囝囝視力受影響，於是昨日即帶對方去檢查，她續道：「好彩，醫生詳細檢查完之後話眼球無事，視力亦好好，傷口仔用些消炎Eye Drop可以幫到手。」婉婉形容今次是不幸中的大幸，又讚BBQ檢查時好合作，並盼囝囝經一事長一智，學習到小心一點。