【對燈發誓】發文反擊韓君婷迫遷令指控 蔡國威嬲爆：我問心無愧

45歲前亞姐韓君婷(鬼妹)被爆出因欠債40萬元，月前申請破產。而她曾解釋，申請破產原因是不想連累朋友，怕朋友會受到財務公司騷擾。破產後她突然搬離跟有情有義朋友蔡國威公屋住所，租住銅鑼灣劏房過新生活。原來兩人已反目成仇，有指在蔡國威知道鬼妹破產後即向她迫遷！韓君婷惟有執埋包袱搬竇，失望得要unfollow蔡國威嘅社交平台又剷走兩人的合照，廿年友情不再！今日凌晨時分蔡國威親撰「Q&A千字文」，以自問自答方式逐點反擊韓君婷指控，字裏行間蔡國威相當激動，甚至可以對燈火發誓冇迫遷：「我問心無愧！由最初我只係本著一心幫助好朋友，希望可以渡過難關，一直回答傳媒都相當保護，但竟然換來今日呢個對待…」他更貼出照片寫著「你對人再真 總有人不領情 你對人再好 也有人不感恩」的字句，對「韓小姐」以怨報德言行感到十分委屈。

逐點反擊不實講法

蔡國威提出4點，用千字文反擊韓君婷迫遷論。

1) 呢7個字「你究竟幾時搬走?」
我可以對燈火發誓，完全冇講過，當日係韓小姐自己親口同我講話搵到理想職業，可以養到自己，然後早一晚同我講:「聽朝11點我會搬走，多謝」

2)有畀4位數字家用。
一直以來我回答傳媒嘅，我可以重申一次，由第一日佢搬來同我住，我已經同佢講，我供樓、水電煤各方面嘅開支都唔需要佢畀，我仲要因為咁每月額外租咗迷你倉，將屋企雜物搬過去，令到空間可以多啲，每個月佢會放低一千蚊畀我，有時多五百，唔係我要求嘅，係佢自己當係補貼下一啲雜費，咁你擺低我咪收，就算六合彩停期間，我自己屋企所有開支都應付自如，我根本冇需要捱麵包。

3) 韓小姐話不想被抹黑，唔可以再講大話包容我，唔想保護我自尊傷害到自己而爆出真相??認清我真面目，唔使瞓梳化??
自從佢申請破產新聞以來，我回答傳媒都係祝福，盡量唔講出真相，何來抹黑??一個人犧牲自己私人空間，冇條件畀你住兩年，我一開始仲話畀房你瞓，你自己話瞓廳都得，你自己唔長進唔腳踏實地，自己堅持辭職賴疫情，我做朋友都仁至義盡，原來呢個真面目係你唔想見到嘅。

4)unfollow IG。
我完全無做任何動作，我一直唔會做埋啲咁小學雞嘅嘢，亦唔會成日check住邊個unfollow我或我要去unfriend人。」

最後我要講一句，雖然我唔係咩富有人家，能力所及，可以幫，我都盡量幫，係需要你歌功頌德，但點解要以怨報德？

蔡國威獲網民力撐

唔少網友力撐蔡國威，叫他加油，只要問心無愧，努力做好自己便可，又話相信他善良的人品。相反韓君婷反而被網友鬧爆，力斥她垃圾唔上進反而推卸責任在幫你的人身上。