陳山聰囝囝下水禮超得意 胡定欣肉緊強吻Jaco面珠

胡定欣早前完成新劇《白色強人II》的內地戲份，回港後急不及待去探望陳山聰囝囝陳霆軒（Jaco）！定欣在社交網大曬與Jaco的合照，短片中更強吻對方面珠三次，乖巧的Jaco一臉天真，任由定欣魚肉。定欣留言：「Jaco仔，Auntie Nancy返黎（嚟）啦！錫啖先！你唔錫我，就我錫你架（㗎）啦！Eeeee.....好肉緊呀！」

圈中不少好友紛紛留言，林子善搞笑表示：「到我啦到我啦！我係想做俾人攬住錫嗰個，細佬你過去嗰邊玩下（吓）玩具先。」姚子羚則代Jaco發聲：「Auntie Nancy 唔好迫我啦！」爸爸山聰亦留言：「我身為佢老豆（竇），仲要拍住自己個仔俾我好姐妹錫到咁，真係唔知俾（畀）咩反應好。阿仔你第日大個自己執生啦！」

此外，山聰昨日在社交網貼出與Jaco去玩水的照片並留言：「大佬人生第一個下水禮，要好好記錄下（吓）」，Jaco與爸爸在水中騎膊馬，着住蝙蝠俠泳衣的他已玩到成身濕晒，似乎好盡興，即使濺起好大水花，Jaco依然眼仔碌碌唔怕水。上水後的Jaco笠住蝙蝠俠毛巾保暖，模樣好可愛呀。