跟周星馳搵食已洞悉危機 田啟文入行40載不斷自我增值
2021-05-27 22:30 
田啟文（田雞）為楊盼盼主持的香港開電視節目《盼你賞面》擔任嘉賓，自幼對娛樂圈事業充滿熱誠的他，笑言自己也是「武林高手」，皆因小時候為入行而學過蔡李佛拳，「嗰時喺天台練，個心成日以為自己得，覺得練過功夫係咪會易啲入娛樂圈，但入行後，一拍動作戲就受傷，發覺呢行飯（動作演員）唔係咁啱自己食，其實我而家覺得動作演員人工太平，唔夠睇跌打，個個動作演員都做到五勞七傷，所以我特別尊重動作演員，用動作去賺呢口飯。」
談到入行首份工是在電視台當臨時演員，惜不獲家人支持，因覺得他沒有個人之處，並不適合在娛樂圈發展，搞到跟家人反晒面的田雞說：「佢哋話『到冇嘢撈你就知』，點知不幸畀佢哋講中，有一段時間冇工開，我頂到山窮水盡、積蓄用晒，唯有去搵普通工，點知見工日，收到電話話請我做『看景』，看住拍攝嘅場景。」
在娛樂圈打滾逾40年，田雞亦體會到要自我增值，他說：「做臨時演員時，有一次深刻體會，有日見到個黑白片時代嘅主角，但而家則淪為配角，於是我心諗『主角唔代表一世都係主角，會有被淘汰嘅時候』，所以就開始有危機感，一定要自我增值；另一次危機感出現，就係跟住『偉大嘅神』周星馳，嗰時好多人都會話係跟住周星馳嘅田雞，但嗰時我諗『萬一佢退休唔做又會點呢？』，好居安思危。」
關鍵字
最新回應