【獨家】馮智恒導演睇中個樣生得鈍 胡子彤演躁狂仔拍到抑鬱

由馮智恒執導電影《遺愛》以一個橫跨兩代的悲情案件作藍本，講述年輕母親Elisa（陳漢娜飾）誕下廸詩（陶禧玲飾）後犯誤殺罪，舉目無親的迪詩於廿年後亦因藏毒被捕。飾演廸詩爸爸的胡子彤今次一脫陽光形象，角色性格較單純兼躁狂，被馮導封為「人生勝利組」的他直言是一個重大嘗試，仲拍到唔識笑又抑鬱！撰文：黎寶倫　攝影：譚壹致　化妝：Bon Bon@MOD makeup academy（子彤）　髮型：Keith@O4（子彤）　服裝：Club Monaco（子彤）、nila_room（禧玲）

談到選角，導演馮智恒笑言睇中胡子彤又鈍又有爆發力，「同齡嘅演員好多都好岀色，但個個都有種『泡菜』感覺，即係唇紅齒白，姜B（姜濤）咁嘅樣。」語畢子彤打趣道：「嘩你睇住呀！啲『姜糖』即刻轟你呀！」馮導即補飛：「我哋拍時姜B未岀道嘛，否則都唔會搵你啦，哈哈！」由於今次角色沉重，全情投入拍攝的子彤也首次出現騷後抑鬱，「成個影視圈都改變緊，我又遇到一個咁嘅機會，做得好唔好唔夠膽講，但相信大家會見到一個唔同嘅我，希望大家嘗試接受唔同嘅演員同片種。」

陶禧玲大讚鄭中基
2019年底，歐鎧淳傳背子彤偷食女籃球員，恰巧戲中老婆也被橫刀奪愛，問現實中可遇過「帽」事？子彤笑謂：「冇冇冇，我咁有型，傻㗎咩！（遇到會隻眼開隻眼閉？）佢唔識貨啦！我Fit到咁，唔係嘛？講笑啫！佢既然做得呢個選擇就要背負後果。」至於首次試鏡差啲被Foul的陶禧玲，獲馮導一句點醒即演出「慘情遺孤」的神髓，她直言拍攝期間長期處於消沉的氛圍。問與鄭中基對戲可有壓力？禧玲即讚對方親切、冇架子，「佢有同我分享演戲時點投入角色。」