【調教你MIRROR】姜濤暫代隊長暗爽 Jer暖男提女友M痛食藥

ViuTV昨晚播出《調教你MIRROR》第二集，12位鏡仔終於到達梅窩。正式入Camp前，梁祖堯轉達經理人花姐的說話，要求大家交出電話。成員向家人Send出「最後的短訊」，其中阿Jer（柳應廷）選擇通知女友，更提醒她M痛要食藥，祖祖疑惑反問「你唔提佢，佢就唔食藥，之後呢14日就會嚟M？」Stanley（邱士縉）代答：「你唔提佢，佢就會話做咩唔提我！」Jer雖然笑晒點頭同意，但亦表示要體諒對方，又暖又甜。

抽籤揀房時，姜濤及Jeremy（李駿傑）都不想與Edan（呂爵安）同房，最後由Jeremy及Ian（陳卓賢）「中獎」！Edan最開心，因為Jeremy好識照顧人，果然係「通渠CP」；Ian就表示Edan在《造星》十強去美國時好污糟，怕房間衛生環境會好差，即被對方反駁「其實我有基本衛生」！

怕房間有鬼的Anson Lo（盧瀚霆）被祖祖嚇親，又被搜出帶「杯」去Camp，原來係漱口杯；Lokman（楊樂文）就被搜出絲質內褲。眾人食Lunch時見到餐廳檯面有4隻杯，激似《MIRROR GO》泰國篇的懲罰環節，姜濤更即時檢查環境，隊員疑心病發作相當不安。另外Lokman可在今次旅程暫時放下隊長身份，他交出位置給姜濤，姜濤對期間限定「梅窩隊長」一職雖然驚訝但又忍唔住笑，期待睇姜隊長表現。最後祖祖也答應大家，今次不會像《MIRROR GO》一樣玩殘12位仔仔。