【小心笑死】同ERROR盧覓雪Agent L.齊拍廣告 古天樂瘋狂跳舞勁玩得
2021-06-14 15:15 
古天樂（古仔）上月中到九展欣賞MIRROR尾場演唱會，騷後ERROR成員193更成功向古仔「集郵」隨後在個人社交網上載古仔搭着他肩膊影的合照，並留言：「知我咩料啦。」即引來不少網民熱議。估唔到話咁快193就有機會同古仔合作，趁住今日端午節假期，古仔、ERROR四子、以及盧覓雪（雪雪）分別在社交平台上載了合作拍攝廣告片段。
片段甫開始見肥仔瞓在地下大叫「好熱好熱」，然後見保錡敷冰、Agent L.（《ERROR自肥企画》導演曹梓冲）繼續以黑衫黑褲黑超扮晒「實Q」造型現身，193施施然揸住風扇出現話：「冇錯！佢就係我『實Ｑ』，feel到啦！知我咩料啦！」扮晒巨星出場。畫面一轉就見到古仔坐在雪櫃隔籬吹住風扇問193，「咁你又知唔知我咩料呀？肥Doi，去開冷氣。」肥仔即望住鏡頭話：「咁黑都怕熱嘅！？」明窒古仔，古仔即用手拍打肥仔塊面，之後雪雪出場問眾人，「係咪熱呀？邊個要雪雪？」ERROR及AgentL.一齊指住古仔。雪雪興奮走向古仔身邊，古仔一邊笑一邊無奈講：「真係正到不得了！」眾人即起哄叫古仔熱就除衫，搞到古仔反問：「咩廣告嚟㗎，成日叫人除衫。」
另一短片中，他們全數換上夏威夷裝，又唱又跳，古仔相當玩得，除了同盧覓雪攞住砂槌對跳外，自己又舉晒手扭晒腰咁跳，而193更扮古仔名曲《今期流行》中大跳的拜神舞動作，即被古仔一腳踢開，而片中所見，古仔似乎特別鍾意撩肥仔玩，親自從後捉住肥仔外，見193捉住肥仔時，古仔又拎住沙槌打肥仔個大肚腩，相當搞笑。最後跳完一輪，古仔叫Cut拉隊收工，肥仔大叫：「我請食沙律。」193在IG再提古仔寫道：「而家知Koo Tin Lok咩料喇，連我實Q都搶埋。Alfred Cho（Agent L.）你唔實Q我，會唔會好冇安全感？」阿Dee則在IG留言：「作為一個演員，無時無刻都要準備好，古生今次可能係嚟casting㗎！上大銀幕指日可待。」連Agent L.也在IG出post：「第一次見到古生真人Not Secured！」
最新回應