被問與陳雅倫緋聞超尷尬 崔建邦談PA辛酸史學識尊重人

林盛斌（Bob）及江美儀主持的TVB J2綜藝節目《Mean Talk》，昨（25日）晚播出最後一集，請來4位參與《明星運動會》拳擊比賽的吳業坤、謝東閔、崔建邦及關嘉敏擔任嘉賓。
在拳擊賽中擔任主持兼領隊的崔建邦，被主持追問被封「溝女王」看法以及過往8段緋聞真偽，Bob更抵死謂：「陳雅倫我真係想知喎？！呢個假㗎嘛。」令崔建邦回應時相當尷尬。談及現任女友Jessica，崔建邦大方直認視對方為結婚對象，並暗示已為結婚做好準備：「適當時機我會嚟㗎喇。」

曾任PA的崔建邦，大談當年工作辛酸，包括硬食別人脾氣、任勞任怨以及超長工作時間，並謂正因有了相關經歷，才真正體悟到尊重他人的重要性：「以前太覺得自己係個artist，成日諗住幾點收得工，『你哋快啲啦，我要趕去食飯呀！』但真正做咗幕後就會諗，『你（藝人）早收去食飯？我仲要返公司大把嘢做呀』。自此我學識咗尊重身邊工作人員係好重要，專業都好重要，我第一次有呢個感覺，呢個長遠嚟講對我係好事。」