錄《演鬥廳》要將花邊新聞擺上枱 王梓軒唔怕激嬲人

王梓軒今日為網上音樂會錄影時表示經常要為TVB節目《演鬥廳》錄影至凌晨兩點鐘，皆因不時出錯發生「蝦碌」事件，又搞笑謂節目快將要改名為「2600」，試過早收半小時覺得自己好似中六合彩。

梓軒又指節目內容好多要即場創作，參與嘉賓需要好大方，因為會將個人事件及花邊新聞即興創作歌詞去唱歌。他說：「最近鄭俊弘（Fred）話有次出席活動時忘記拉褲鍊，報導出街先知。不過上來節目的嘉賓唔會嬲，就係拎呢啲嚟玩。」問到可會擔心激嬲嘉賓？他說：「無人嬲，所以咪話要大方囉！佢哋要大方，我哋照玩之嘛！」