粗獷老竇的溫柔親子活動 李璨琛幫囡囡搽指甲油

45歲嘅李璨琛之前成日要返內地工作，自上月回港後都仍然留港，見佢好忙，同黃浩然跑山，又去遊船河，係咁約朋友見面，當然要留番多啲時間陪三歲KOL囡囡Lucy(李元元)。

Lucy嘅IG Follower有成30萬，多過爸爸三萬幾，爸爸回歸令囡囡嘅IG豐富咗內容，之前就有Lucy同爸爸玩梳頭，最新有紋身爸爸變身修甲師，溫柔地幫囡囡搽指甲油，見爸爸拎住小掃同囡囡嘅指甲油顏色，仲識等乾咗少少再加啲閃粉，完成成個程序，Lucy就行去坐地風扇前吹乾，由於身高同風扇一樣咁高，吹乾指甲之餘連啲頭髮都吹到亂晒籠，好得意。