【獨家】花三年自資六位數出歌 林德信搵林子祥拍MV有畀利是

36歲嘅林德信(Alex) 自資6位數以獨立歌手身分，推出國語新歌《愛沒有理由》，Alex坦言今次投資很大，大到可以用呢筆錢買可升值嘅名錶，但他無悔，除咗因為太鍾意呢首歌，更希望藉住新歌，能永遠代表到他是獨立音樂人的身分，會更加難得。採訪：方騫平 攝影：譚壹致 化妝：Jess Yung 髮型：Negan Leung @ haircorner 服裝：Loro piana,Washi jeans,Soft Serve and Sake 場地：Cubus 28 x月下酌

林德信的《愛沒有理由》為求做到完美，足足花咗3年時間製作，除咗要夾音樂大忙人恭碩良時間外，其後又改咗少少唱法，後段要他唱得好爆及好高音，用以代表他對件事的堅持，Alex再花時間去練，單係錄音都搞咗一年，跟住MV籌備咗半年，同埋要做後期電腦特技。

阿爸冇資助
Alex以往拍MV只會隨意用手機拍攝，同今次咁大陣仗相差好遠：「新歌好有故事性，要有多啲電影感，計計埋埋花費6位數字，足夠用嚟買隻名錶！𠵱家真係明白晒做音樂原來係有幾難，所以我唔會首首歌都咁做。」當問到係咪有信心投資喺自己嘅音樂上，升值潛力更勝名錶？他大笑說：「唔敢咁講！投資喺自己作品度係開心嘅，尤其每次有作品出嚟，大家會睇到唔同嘅我。」他聲稱daddy林子祥冇開聲喺金錢上作支援：「我又冇問佢，佢相信我喺能力範圍應付得到。今次我邀請佢拍MV都有封返利是畀佢㗎，雖然唔係大封，但佢都開心嘅！」