為加拿大電台表演 馮允謙兩年冇見媽咪欣宜唱畀家人聽

在加拿大成長的華人，都一定認識加拿大中文電台，在加成長的鄭欣宜（Joyce）及馮允謙（Jay Fung）也不例外。Joyce說：「我自細聽『加拿大中文電台』，因為婆婆好鍾意聽。今次表演，有一種返屋企嘅感覺。」日前她與Jay接受加拿大中文電台邀請，為網上《加拿大中文歌曲創作大賽》決賽，擔任表演嘉賓。雖然受疫情影響不能親身飛到當地，但日前在香港拍攝表演項目時，坦言心繫當地的家人和朋友。

一歲半便隨家人移民到加拿大愛民頓的Jay Fung，原來已有兩年時間沒有見到媽媽，於是他也趁此機會，隔空和媽媽畀心心，而Joyce也熱情地對馮媽媽大講「I love you」！Jay Fung表示非常掛念家人:「媽咪知道我今次表演好開心，仲專登去搵我哋做封面、報道今次活動嘅雜誌。兩年無見媽咪真人，好掛住佢。今次揀咗兩首自己創作和參與嘅《思念即地獄》和《山旮旯》，一路唱一路諗住媽咪，佢話會叫埋啲朋友一齊睇。」

其實Joyce每年都會回溫哥華或多倫多最少探親一次，前年更到當地參與慈善活動。不過同樣因疫情原故，近兩年沒回到加拿大。今次她隔空表演給當地人看，就選唱了《＠princejoyce》和新歌《先哭為敬》。除了自己的作品，Joyce和Jay Fung還合唱了陳奕迅的《陀飛輪》，Joyce說：「呢首歌好適合呢個時候，呢兩年好多人都唔可以飛去第二度見屋企人，希望大家聽住我哋嘅歌，諗住掛念嘅人。」

欣宜及Jay有不少共通點，除了都在加拿大成長，更一樣回到香港追尋音樂夢，而且追夢的過程並不容易。Joyce說：「我最困難係入行最初幾年，好多負面聲音，話我揀嘅路係錯。甚至初入行時有一位我好尊敬嘅前輩，叫我唔好唱歌！但我堅持，慶幸我有能力追夢，堅持夢想。」Jay Fung安慰她說：「依家證明你入行係正確，好成功。無論做咩都會有障礙，或者會有人懷疑你嘅能力，所以只要專注你要做嘅事，相信自己。」而Jay Fung也分享到十年前隻身來香港生活上有很多難以適應的地方，包括天氣和語言，他說:「我中文唔叻，就連去茶餐廳都唔識睇餐牌嗌嘢食，有時會偷睇隔離枱食乜就照跟，否則只識得叫『叉燒燒肉飯』，所以以前食好多呢款飯。」不過他未有因此怕了吃燒味飯，到現在依然愛吃。