「神徒」李婉華一星期兩度與「教主」合照：我心花怒放

李婉華近日從加拿大回港探望朋友，連日來爭取時間與朋友見面，不時在FB晒好友見面的合照，當然在芸芸合照中，最令婉華興奮的，一定是與「教主」Anson Lo合照！自言是「神徒」的婉華，上月底參觀ViuTV時，首度與教主合照，當時她大讚教主斯文又溫柔，假如沒有年齡限制的話，她必定會參加他的MV女主角的面試！

昨日婉華到商台為好友阮兆祥的節目做嘉賓，期間她剖白自己為「神徒」的經過：「我睇完《大叔的愛》之後，愛上咗Anson Lo，佢真係好乖，好斯文又大方，好鍾意阿牧呢個暖男，每個人心目中都要有一個阿牧！」祥仔又問到與Anson Lo見面的第一個感覺，她冧爆地說：「我有同佢示愛，仲掂過佢添呀！臂彎啫，但係都感覺到嗰啲氣場，嗰啲暖風呀，暖男噴暖風出嚟呀，真係暈一暈，呢個見面簡直係非常優！」

想不到機會竟然可一又再，婉華在商台接受完訪問後，竟然又撞見同樣接受完鄭裕玲（嘟姐）訪問的Anson Lo，婉華當然不放過再次合照的機會，接着她又再在社交平台晒命︰「我和教主的緣分，不是人人都擁有。今天上商台接受Terry及阮兆祥《一圈圈》訪問，再次遇上教主！我心花怒放！」有「神徒」見到合照紛紛表示又羨慕又妒忌，有人讚她是「最幸運嘅神徒」，但亦有人笑言叫她要低調！