葉巧琳與張進翹拍MV有超激場面 擔心另一半難接受

葉巧琳 (Mischa)早前邀請《全民造星III》的隊友張進翹 (Manson) 擔任新歌《心獸 (怪物Version）》的MV男主角，Mischa 承繼前MV《森林女王‧大地之母》的角色，靈魂經過千年轉生，成為現代貴族；至於 Manson 就由一隻狼，轉生再轉生，活在現代神父的軀體中，Manson 覺得自己的戲服有點戰士 feel，新歌內容是首講到人性內心欲望，對於這個構想，Mischa 透露：「每個人或多或少有啲黑暗嘅一面，有唔同程度嘅欲望，好希望透過呢首歌可以同大家分享到呢樣嘢。我覺得大家唔使驚呢個欲望，佢可以成為你嘅動力，當兩樣嘢融為一體嘅時候，個人先更加豐富。」今次拍MV，Mischa 亦趁機自肥，她笑說：「我想要集唔同嘅美男子喺我嘅MV入面，今次唔止MV，仲集埋喺首歌入面，Yeah！」

Mischa 在MV中做主動的一方：「我愛慕佢，我喺 MV 中嘅欲望就係強烈地想得到佢嘅身體同愛，因為我之前大地之母都係鍾意男人，所以嚟到呢度都係好鍾意，而我見到鍾意嘅男人，就好想得到佢囉！」Manson 補充稱：「我有迴避嘅，我諗過點解今世要做神父，應該係想抑壓我人狼嘅一面，自己不停壓抑自己嘅欲望。」雖然 Mischa 應 Manson 要求，MV中沒有錫錫場面，但少不免有親密戲，最激烈出現了舔耳珠及咬耳仔一幕，Mischa 演完後擔心另一半接受不來：「我拍完之後有啲擔心，仲有啲驚呀！我唔知個MV出嚟之後，佢嘅接受能力可以去到邊……」Manson 也怕自己的「小命不保」！