創作16首新歌被公司彈回頭 布志綸一度心灰靠攀石攞靈感

布志綸(Alan)日前作客TVB娛樂新聞台節目《StarTalk》，接受主播許文軒(Edmond)專訪，大談轉投新唱片公司推出歌曲《第一億次細胞分裂》感受，Alan説：「其實簽咗新公司後都磨合咗一段時間，呢大半年一直有寫歌，大大話話交咗16、17首歌，但公司一直唔收貨，佢哋想我簽約後第一首歌光明少少。好記得開咗嗰個會之後，好似畀人打咗一錘，當時有少少想喊，唔通又要等！第二日本身約咗朋友攀石，差啲想放飛機，唔知點解去到風和日麗，陽光普照，成班人好熱血，成件事好有力量，攀石嘅環境令我有靈感構思旋律，原來攀緊石係可以作歌！」

談到近年愛上和陽光玩遊戲，Alan說：「受中學同學影響，多咗玩戶外運動，以前我好怕水，遊船河、划艇一定Say No，因為驚浸親同暈船浪，依家鍾意行山、攀石、滑水同划艇，試過自己一個人出海划艇划咗10Km，自己都估唔到，依家曬到『黑萌萌』！」

對於恩師Gary Tong唐奕聰離世，Alan仍有不捨，他說：「佢嘅離開令我戒煙，因為覺得自己要為佢改變，因為真係冇諗過佢走得咁突然，本身一路話約食飯，但疫情關係好耐冇見，但原來唔搵唔搵就可以消失咗。佢唔鍾意人唔開心，所以要開心啲！做音樂嘅態度要享受，要玩得開心。」