创作16首新歌被公司弹回头 布志纶一度心灰靠攀石攞灵感

布志纶(Alan)日前作客TVB娱乐新闻台节目《StarTalk》，接受主播许文轩(Edmond)专访，大谈转投新唱片公司推出歌曲《第一亿次细胞分裂》感受，Alan説：「其实签咗新公司后都磨合咗一段时间，呢大半年一直有写歌，大大话话交咗16、17首歌，但公司一直唔收货，佢哋想我签约后第一首歌光明少少。好记得开咗嗰个会之后，好似畀人打咗一锤，当时有少少想喊，唔通又要等！第二日本身约咗朋友攀石，差啲想放飞机，唔知点解去到风和日丽，阳光普照，成班人好热血，成件事好有力量，攀石嘅环境令我有灵感构思旋律，原来攀紧石系可以作歌！」

谈到近年爱上和阳光玩游戏，Alan说：「受中学同学影响，多咗玩户外运动，以前我好怕水，游船河、划艇一定Say No，因为惊浸亲同晕船浪，依家锺意行山、攀石、滑水同划艇，试过自己一个人出海划艇划咗10Km，自己都估唔到，依家晒到『黑萌萌』！」

对于恩师Gary Tong唐奕聪离世，Alan仍有不舍，他说：「佢嘅离开令我戒烟，因为觉得自己要为佢改变，因为真系冇谂过佢走得咁突然，本身一路话约食饭，但疫情关系好耐冇见，但原来唔搵唔搵就可以消失咗。佢唔锺意人唔开心，所以要开心啲！做音乐嘅态度要享受，要玩得开心。」