專訪｜叫停郊野公園邊陲地研究 林鄭：這是德政！

　　（星島日報報道）林鄭月娥在五年任期間，提出了「明日大嶼」及「北部都會區」兩大願景，但被批評不能解決目前房屋供應短缺的燃眉之急，被問及她上任初期叫停房協關於郊野公園邊陲地的研究，是否失策，她隨即否認：「呢個係德政！」林鄭指，郊野公園深受市民、海外遊客和居於香港的外國人歡迎，郊野公園與市區間又有逾一萬六千公頃的綠化地帶，反問未去到最後階段，為何要破壞郊野公園，「除非無常理嘅人啦，常理嘅人點解唔係處理咗啲綠化帶，一跳跳咗入去處理郊野公園呢？要攞走郊野公園的地呢？」

  她不認為，當初若無叫停，就可以加快土地開發，「程序問題，我可以同你輸賭，如果當日繼續做郊野公園，呢個項目今日都唔會完工，唔係話起唔到樓，因為根本唔會做完啲程序呀。」她解釋，要「破壞」郊野公園的程序比城規程序更複雜，因受《郊野公園條例》保護，要諮詢郊野公園及海岸公園委員會，又需要作環境影響評估及改劃土地，「根本唔易做得到。如果做得到，上一屆政府就一早做啦。係咪？」

  問及至今是不是認為郊野公園一吋不能少，她回應：「係呀。我哋仲要開紅花嶺多一個郊野公園。」她並指這可以建設好梧桐山、紅花嶺與八仙嶺山脈的生態走廊，讓市民享用。

  對於有指上屆政府與環保人士達成共識，以紅花嶺納入郊野公園，換取政府於大欖及水泉澳邊陲土地建屋。林鄭月娥則說：「我唔知喎，我無呢啲記憶。因為當年我都唔喺政府，係咪？二○一七年我離開政府，辭咗職之後（政府）先做，所以我唔知點樣決定。我亦都唔知道點解係房協做。啲城市規劃同埋土地改劃嘅嘢唔係政府做咩？你話啦，點解係房協做？房協係起樓，所以你仲問我係咪失策，點解會叫房協做，我根本都解釋唔到畀市民聽。我都解釋唔到畀房協聽，點解要咁樣做。」對於她既愛護郊野公園，但又同意發展濕地緩衝區放寬地積比，林鄭指《施政報告》提出的都是前瞻性發展策略，政府目前仍未就發展濕地緩衝區做研究，要待環境局詳細就魚塘及濕地作研究，「然後睇下邊啲係緊要，邊啲係無咁緊要。同埋周邊嘅環境，以至發展空間係點，先至決定。」她說，「一行入北區或者坐直升機，真係好多地，係好多魚塘地、好多濕地、好多濕地緩衝區的地。咁一係就咩都唔發展囉，要發展嘅時候就要有一個積極嘅態度去發展。」