獨家丨施匡翹自爆入行兩年冇人追自認保守阿媽好想佢拍拖

2021-11-06 03:00

施匡翹（Zaina）今年3月出完《康復期》後，事隔半年再推出新歌《Stay》，新歌唱出心聲，唔好貪靚仔去玩火，要冷靜觀察同分析。入行兩年嘅施匡翹自爆零追求者，她強調屬保守型女仔，唔會隨便開始一段感情，反而媽咪好想佢快啲拍拖，有男友從旁照顧。採訪：方騫平攝影：沈健程化妝及髮型：Wingkee Makeup 形象：C.Jo Lee

施匡翹出嘅第5首歌《Stay》係提醒大家，要對愛情「三思而行」。MV中她化身占卜師，一人分飾多角，其中「惡魔」造型會突破過往乖乖女形象，大騷46吋長腿突顯性感狂野一面。原來中學時期嘅施匡翹曾跳過街舞，其後轉玩瑜伽，𠵱家仲考埋瑜伽導師牌可以開班教人。

同娛圈人冇乜交流

25歲施匡翹自爆18歲初戀，拍咗兩年拖：「做兼職時認識，後來我升學，佢就繼續工作，大家少咗共同話題變得疏離，因為係和平分手，我哋留下嘅係開心回憶，如去長洲踩單車、食糯米糍，但媽咪一定唔會畀我過夜，就算𠵱家去做嘢，媽咪要知晒我schedule，否則成日打嚟問『阿B(乳名)你做緊乜？食咗飯未？』可能我係獨女，佢驚我照顧唔到自已，好想我拍拖有人照顧，反而爸爸性格較小朋友，閒時愛打機多個管我。」施匡翹自言入行至今都冇人追，她與歌手們工作時來去匆匆冇乜交流，大家都忙只能閒聊兩句，從來冇WhatsApp往來，IG互相關注除師弟謝高晉外只有馮允謙，她笑說：「我IG有follow張敬軒，但佢唔識我，冇follow我！」